2030 чылга чедир Тываның социал-экономиктиг хөгжүлдезиниң тускай программазын Россияның Чазаа доктааткан деп Тываның Баштыңы Владислав Ховалыг социал четкиде бодунуң арнынга демдеглээн. «Ук айтыышкынга РФ-тиң Чазааның Даргазы Михаил Мишустин адын салган.
2020–2024 чылдарда ук программа республиканың бүдүрүлге комплекизин калбартырынга идигни берген. Ылаңгыя хууда тудуг материалдарын бүдүреринге улуг деткимче болган. Россияның экономика хөгжүлдезиниң сайыды Максим Решетниковтуң удуртулгазы-биле дыка хөй белеткел ажылдарын кылып чорудуп тура, Федералдыг яамыларның сүмелерин барымдаалаан бис. Ук төлевилелди Федерация Чөвүлелинге болгаш РФ-тиң Күрүне Думазынга база өөренип көрген.
2030 чылга чедир алды чылдың дургузунда аңгылаан акшаландырыышкынның 90 хуузун экономиканың хөгжүлдезинче угланыдары планда көрдүнген. Туризм адыры болгаш тудуг материалдарының бүдүрүлгези кол черни ээлеп турар. «Хандагайты» эрттирилге пунктузунуң тудуунче база улуг кичээнгейни угландырар. Хууда бүдүрүлгелер болгаш фермерлерни деткиири чугула черни ээлеп турар деп санап турар бис. 2023 чылдың түңнелдери-биле иштики курлавыр талазы-биле өзүлде бар дээрзин демдегледивис.
2025–2030 чылдарда ук программаның деткимчези-биле 1794 ажылчын олуттарны тургузары планда көрдүнген. 14,8 миллиард хире рубльга инвестицияны киириштирер. Үндүрүгнүң түңүн 1,5 миллиард рубль чедирер дээш, ажылдаар бис».
Бистиң корр.
“Шын” №97 2024 чылдың декабрь 18