“Убсунур ыйгылаажы” бойдус камгалал чериниң ажылдакчылары волонтёрлар-биле Тываның девискээринде Чихачев аттыг дагларже бирги эртем экспедициязын организастаан.
Ук хемчегниң кол сорулгазы – Россияның Кызыл дептеринче кирген ховар аңның – ирбиштиң чурттап турар девискээрин шинчилээри. Командаже беш тускай специалист-биле база ол-ла хире санныг волонтёрлар кирген. Киржикчилер чогуур девискээрлерни шинчилеп, эргижирээн он камералыг дузактарның байдалын хынап, ол ышкаш хүн дузазы-биле ажылдаар, мобильдиг херекселдер таварыштыр ырактан башкарып болур 18 чаа бедик деңнелдиг 4K форматтыг херекселдерни тургускан.
Делегейде каш санныг, эвээш арткан чараш аңны камгалаар ажылды чорудуп турар “Ирбиш” деп регионнар аразының каттыжыышкынындан ук шинчилел ажылы деткимчени алган. Чаа технология-биле бо онзагай аңның баш санын хынаарынга болгаш үргүлчү шинчилел ажылдарын чорударга, эптиг болгаш шынарлыг болур.
Оон ыңай мындыг чижектиг экспедицияларны доктаамал чорудар деп сорулга салдынган. Ол шинчилел девискээрин калбартып, регионнуң онзагай дириг амытаннарын кадагалаарынга улуг салдарлыг.
/ О. СААЯ белеткээн.
“Убсунур ыйгылаажы” бойдус камгалал чериниң чуруктары.
“Шын” №27 2025 чылдың июль 17