Россияның тудуг болгаш чуртталга-коммунал ажыл-агый сайыды Ирек Файзуллинге Тываның Баштыңы Владислав Ховалыг ужурашкан.
Амгы үеде боттандырып турар «Чуртталга тудуу болгаш хоорай хүрээлеңи» национал төлевилелге киирген федералдыг төлевилелдерни болгаш программаларны боттандырып турарын, «Чуртталгага инфраструктура» төлевилелди тургузарының айтырыгларын ужуражыышкын үезинде сайгарып чугаалашкан. Чуртталга тудугларын ажыглалга киирериниң планнаттынган көргүзүглерин республика күүседипкен. Росстаттың сан-чурагайлары ёзугаар алырга, бо чылдың эрткен сес айларында 243,2 муң дөрбелчин метр чуртталга шөлүн ажыглалга киирген, ол дээрге эрткен чылдың бо-ла үезинге деңнээрге, 70,2 хуу хөй.
«Стимул» программа ёзугаар хоорай чергелиг Каа-Хем суурда микрорайонда тудугларны чуунду сугларны төгериниң төпчүткен технологтуг системазынга кожары планнаттынган.
Бо чылдың март айда Шагаан-Арыг хоорайның төп одалга черинге озал-ондак болганы-биле холбаштыр чаа одалга төвүнүң төлевилелин ажылдап кылыр төлевилел организациязын шилип алыр талазы-биле ажыл чоруп турар. Чаа одалга төвүн тудуп доозарынга чедир эрги одалга черин үрелиишкин чокка ажылдадырының хемчеглерин ап чорудары чугула.
Хоорай хүрээлеңиниң чаагайжыдылгазын экижидер талазы-биле хөй ажылды кылып чоруткан, амгы үениң чаа болгаш делгем девискээрлерин тургузуп турар. «Таарымчалыг хоорай хүрээлеңин хевирлээри» федералдыг төлевилел ёзугаар республикада бо чылын планнаттынган 30 хөй-ниити девискээриниң чээрби үжүнге ажылдарны доозар.
Таарымчалыг хоорай хүрээлеңин хевирлээр талазы-биле төлевилелдерниң IХ Бүгү-российжи мөөрейниң түңнелдерин бо чылдың август айда үндүрген. Тыва Республикадан үш төлевилел тиилекчилерниң аразынче кирген: Туран биле Шагаан-Арыг хоорайларда ийи кудумчу, ол ышкаш Кызылда хөй-ниити зоназы.
Россияның Тудуг болгаш чуртталга-коммунал ажыл-агый яамызының медээлеринден Ш. МОНГУШ белеткээн.
“Шын” №77 от 2024 чылдың октябрь 9
