Хүндүлүг кадык камгалал адырының хоочуннары болгаш эмнелге ажылдакчылары!
Силер бүгүдеге професионал байырлалыңар – Эмнелге ажылдакчызының хүнү-биле байырым чедирип тур мен!
Бо хүнде Тывада чоннуң кадыкшылы дээш аарыг-хамчык-биле демиселдиң мурнуку одуруунда 12 муң ажыг эмнелге ажылдакчылары турар, оларның аразындан 2 муңу – эмчи деп чоргаар аттың эдилекчилери.
Чоннуң кадыкшылын кадагалаары база быжыглаары, чурттаар назынын улгаттырары бистиң күрүневистиң социал политиказының бир кол чугула угланыышкыны болуп турар. Республикавыста кадык камгалал адырын модернизастаарынче угланган программаларның чедиишкинниг боттанып турары, поликлиникалар, эмнелгелер, эмнээшкин төптериниң материал-техниктиг баазазын быжыглаарынче угланган сагыш човаашкынның доктаамал болуп турары өөрүнчүг-дүр.
Тываның эмнелге ажылдакчыларының көвей кезии – езулуг тура-соруктуг кижилер деп бүзүрелдиг чугаалап болур мен: олар дыштаныр хүннер, байырлалдар дивейн ажылдап, кайы-даа үеде дуза кадып чедип кээрлер.
Бистиң эмнелге ажылдакчыларывыстың бедик мергежилдиин Тываның хөй-хөй чурттакчылары, оларның аразында чаа коронавирус хамчыы-биле аарып турган кижилер, эскерип-билип алыр аргалыг болганнар. Пандемия үезинде бистиң эмчилеривис быжыг тура-соруун болгаш ханы сагыш-сеткил күжүн бадыткааннар.
Регионнуң кадык камгалал адырының тургустунарынга, хөгжүүрүнге база улам сайзыраарынга канчаар-даа аажок улуг үлүг-хуузун киирген, бүгү назынын ынак мергежилинге тураскааткан хоочуннарга улуу-биле өөрүп четтиргенивисти илередип тур мен.
Эргим эш-өөр! Кызымаккай күш-ажылыңар, салым-чаяаныңар болгаш бедик мергежилдииңер, мергежилиңерге бердингениңер дээш сеткилимниң ханызындан өөрүп четтирген сөстеримни хүлээп ап көрүңер!
Шыдамык чорук, бедик мергежил болгаш мерген угаан бүгү ажыл-херектериңерге, эгелээшкиннерге дуза болзун! Силерге быжыг кадыкшылды, тайбың дээрни, эгээртинмес аас-кежикти база ажыл-үүлеңерниң кайы хире белен эвезин эки билир өг-бүлеңерге шыдамык чорукту күзедим!
Тываның Баштыңы Владислав Ховалыг.
