2026 чылдың январь эгезинде Тывада «Көдээ черниң башкызы» деп федералдыг программаже конкурс шилилдези эгелээн. Кадрлар чедишпес көдээ школаларже база хоорайларже башкыларны хаара тудары – кол сорулга.
Мониторингиден алырга, республиканың ниити өөредилге албан черлеринде 200 хостуг олуттар бар. Математика башкылары (41), англи дыл башкылары (30), орус дыл болгаш литература башкылары (27) школаларга эң херек. Оон аңгыда эге класстар, физика, информатика башкылары дээш өске-даа эртемнерге специалистер негеттинип турар.
17 чурттакчылыг черлерже башкылаарын чалаан 25 тускай ажылчын олуттар даңзызын 2026 чылдың программазынче киирип бадылаан. Шилилгени чедиишкинниг эрткеш, ажылче көжүп кирген башкылар чаңгыс удаа бээр компенсация төлевирин алыр.
Программада эң хөй ажылчын олуттарны математика башкыларынга (7), англи дыл башкыларынга (5) тускайлаан.
Республиканың шупту кожууннары – Бай-Тайгадан Эрзинге чедир, ол ышкаш Ак-Довурак хоорайда география башкылаар хостуг олуттар бар. Тээли школазынга физика башкызы, Аржаан школазынга төөгү башкызы, Солчур школазынга химия башкызы херек.
Регионнуң Өөредилге яамызының дыңнатканы-биле алырга, январь 20-ге чедир программаның порталынче 44 билдириишкин онлайн-хевирге кирген. Бир дугаар кижи Бии-Хем кожууннуң Хүт ортумак школазының эге класстар башкызы хостуг олутче документилерин дужааган.
2026 чылдың апрель 15-ке чедир билдириишкиннерни хүлээр. ТР-ниң Өөредилге яамызының албан ёзузунуң сайтызында хостуг олуттар, киржир кандидаттарга байдалдар болгаш негелделер дугайында тодаргай медээни салган.
ТР-ниң Чазааның парлалга албанының медээзи болгаш чуруу.
“Шын” №3 2026 чылдың январь 29