Юрий Учурал — Тыва АССР-ниң алдарлыг малчыны, «Күш-ажылдың алдар ордениниң» эдилекчизи, хөй чылдарда күш-ажылы-биле Эрзин кожуунунуң хөгжүлдезинге улуг үлүг-хуузун киирген, чонунга хүндүткелдиг көдээ ишчиниң намдары аныяк-өскенге үлегер-чижек.
Юрий Марсууевич 1964 чылда Эрзин районнуң Мөрен сумузунга бөдүүн арат малчын өг-бүлеге төрүттүнген. Марсуу Дамдисууевич биле Долгар Тере-Бижиевна Учуралдарның хөй ажы-төлүнүң ортун оглу.
1982 чылда школа дооскаш, 1-ги разрядтың чолаачызы мергежилди чедип алгаш, Мөрен совхозка чолаачылап ажылдап эгелээн. Шериг албан-хүлээлгезин Амур областың артиллерия кезээнге эрттирген. 1985-1990 чылдарда Красноярскының көдээ ажыл-агый институдунуң Кызылда салбырынга өөренип дооскан. Институт соонда Мөрен совхозка кол агрономнап ажылдап киргеш, Үнегети хову бригадазынга хөй тарааны өстүрүп, күрүнеге дужаап турган.
Мөрен совхозка директорлап, оон кожууннуң көдээ ажыл-агыйынга агрономнап, «Мандала» МУБ-ка директорлап ажылдаан.
2000 чылдарда хууда арат фермерлеп, чер ажылы-биле ажылдаан. Мөрен суму чагыргазының суму баштыңынга чедир ажылдааш, хүндүлүг дыштанылгаже үнген.
Амгы үеде хууда чер ажыл-агыйы-биле ажылдап, картофель, мал чеми сиген тарып, чонга дузалажып, артыкшылдыын садып-саарып чурттап чоруур.
Эрзин кожууннуң 85-тээн юбилейлиг чылында ат-алдарлыг хоочунунга чаңгыс чер чурттуглары кадыкшылды, узун назынны, өг-бүлезинге эки-чолду, ажыл-ижинге чедиишкиннерни күзеп турар.
Медээни болгаш чуруктарны Эрзин кожуун чагыргазының соцчеткиде арнындан алган.
“Шын” № 39 2026 чылдың октябрь 8
"Шын" солуннуң МАХ-каналынга каттыжыңар: max.ru/channel_shyn