Саратов хоорайга XXXVI Собинов ыры-хөгжүм фестивалының ыраажылар мөөрейи болуп эрткен.
Мөөрейниң шииткекчилеринден аңгыда, көрүкчүлер база боттарының бодалын илередир аргалыг болганнар. Концертке келген кижи бүрүзүнге бодунуң таарзынган киржикчизин демдеглээри-биле, бадылаашкын саазыннарын тудускан.
Мөөрейге киришкеннер барык шупту кайгамчык салым-чаяанныг кижилер болган. Эң-не тергиин ыраажылар Россияның регионнарын төлээлеп киришкеннер.
Ылаңгыя Тывадан Карина Ховалыгны фестивальга келгеннер чылыг-чымчак уткуп алганнар. Ол Москваның консерваториязында өөренип турар. 2017 чылда ол Санкт-Петербург хоорайга делегей чергелиг ыраажылар мөөрейинге I чергениң лауреады болган. А 2019 чылда Италияга Лучано Поваротти фондузунуң ыраажылар мөөрейинге I шаңналга төлептиг болган.
Собинов фестивалынга Карина Ховалыг Көрүкчүнүң сонуургалы шаңналдың эдилекчизи болган. 45 муң рубльди холга алыр.
Салым-чаяанныг чаңгыс чер чурттуувуска ам-даа тура дүшпейн, бедиктерже чүткүп, улаштыр чедиишкиннери көвүдээрин күзеп каалыңар.
