Кызыл, Мөңгүн-Тайга, Сүт-Хөл, Тес-Хем, Чеди-Хөл, Бай-Тайга, Каа-Хем база Өвүр кожууннарның көдээ суурларында чурттап, ажылдап чоруур тос чурттакчы бо чылын «Көдээ девискээрлерниң комплекстиг хөгжүлдези» күрүне программазының күүселдези-биле чурттаар оран-сава байдалын экижидер аргалыг. Тываның Чазааның айтыышкыны-биле чуртталга тудуунга төлевир кылдыр күрүне деткимчезин алыр кижилерниң даңзызын бадылаан.
«Көдээ девискээрлерниң комплекстиг хөгжүлдези» күрүне программазының мурнады боттандырар угланыышкынынга көдээ суурларга инфраструктураны тудуп, хөгжүдери база күш-ажыл рыногун (кадр курлавырларын) хөгжүдери-биле чергелештир, көдээ чурттакчы чонну чедингир болгаш таарымчалыг чурттаар оран-сава-биле хандырар байдалдарны тургузары болур.
Тываның Экономиктиг хөгжүлде болгаш үлетпүр яамызы муниципалдыг районнарның чагыргалары чуртталга байдалын экижидеринге хереглелдиг хамаатыларның, аныяк специалистерниң болгаш көдээ черлерже көжеринге белен хамаатыларның аразындан субсидия алыр кордакчыларның даңзызы тургустунганын дыңнаткан. 2023 биле 2024 чылдарда көдээ черлерде чурттап турар 49 хамааты деткимчени ажыглаан.
Программаның негелдези-биле алырга, агроүлетпүр комплекизиниң ажылдакчылары болгаш мал эмчилери, ийиги черде — социал адырга ажылдаар ажылдакчылар көдээ суурларга бажың тудуу дээш төлевирлерни мурнады алыр эргелиг.
«Көдээ девискээрлерниң комплекстиг хөгжүлдези» программа Тывада элээн каш угланыышкыннар-биле күүсеттинип турар.
Күрүне программазының ачызында 2024 чылда республикада «Көдээ девискээрлерниң амгы хевири», «Көдээ девискээрлерниң чаагайжыдылгазы», «Көдээ черлерде чуртталга тудуун хөгжүдери болгаш өрегелерниң чаагайжыдылгазын бедидери» база «Көдээ девискээрлерде транспорт инфраструктуразын хөгжүдери» деп дөрт угланыышкынга төлевилелдерни боттандырган.
Кызыл кожууннуң Элегес-Аксы, Улуг-Хемниң Арыг-Бажы, Сүт-Хөлдүң Суг-Аксы, Чаа-Хөлдүң Булуң-Терек суурларда спортчу ойнаар дөрт шөлдү туткан.
«Көдээ девискээрлерниң амгы овур-хевири» федералдыг төлевилел күүселдези-биле Каа-Хем кожууннуң Сарыг-Сеп суурда уруглар садының капиталдыг септелгези доозулган. Таңды кожууннуң Бай-Хаак суурда Мир, Комаров, Шоссейная кудумчуларда кудуктарны эде чаарткан. База ол ышкаш Каа-Хем кожуунда Бүрен-Аксы база Эрзин кожуунда Нарын суурларже кирер оруктарны септээн.
Бо чылын Улуг-Хем кожууннуң Чодураа суурда 176 олуттуг школада база Таңды кожууннуң Бай-Хаак суурда клубта тудуг ажылдары уламчылаар.
ТР-ниң Чазааның парлалга албаны.
Чурукту интернет четкизинден хоолгалаан.
«Шын» №9 2025 чылдың март 13