Август 22-де Кызыл хоорайның төвүнде Арбат шөлүнге ТР-ниң Баштыңы Владислав Ховалыгның киржилгези-биле күрүне туктарын байырлыг байдалга көдүрткен. Аңаа Чазак Даргазының оралакчылары, сайыттар болгаш ТР-ниң Дээди Хуралының (парламент) депутаттары, федералдыг албан черлериниң, хөй-ниити организацияларының төлээлери киришкен.
Күрүне Тугунуң хүнүнде 14 хар четкен Россияның беш хамаатызынга паспорттарны тывыскан. Паспортту бир-ле дугаар холга ап турар элээдилерге ТР-ниң Баштыңының холундан документ алыры – улуг өөрүшкү дээрзин Кызылдың 7 дугаар школазының өөреникчизи Алина Бады демдеглээш, «Өөреникчи бүрүзү үези кээрге паспортту холга тудар. Ынчалза-даа кижи бүрүзү Чазак Даргазының холундан байырлыг байдалга паспорт албайн турар. Ынчангаш бис аас-кежиктиг болдувус. Паспорт столундан кандыг-даа байырлыг езуга ап болур турган болгай бис» — деп, ол немеди.
РФ-тиң Президентизиниң Чарлыы-биле эрес-дидими, күш-ажылга карак кызылы дээш, полиция ажылдакчылары Орлан Саая биле Эккер Мугурну «Хөй-ниити чурумун тударынга шылгараңгай чоруу дээш» деп медаль-биле шаңнаан.
Күрүне туктары көдүрер езулал үезинде ТР-ниң Тимур Дулуш аттыг үрер хөгжүм оркестри аян тудуп, байырлыг чыскаалды шинчи киирген.
Айдың ОНДАР.
Буян ООРЖАКТЫҢ тырттырган чуруу.
"Шын" №62, 2023 чылдың август 23