Россияның прокуратура ажылдакчызының хүнү
Император Пётр I 1722 чылдың январь 12-де чарлыы-биле Россияның прокуратуразын доктаадып тургускан. Күрүне эрге-чагырга албан черлеринде, судтарда хоойлу-дүрүмге дүүшпес болгаш хээли алыр чорукту чок кылыр болгаш күш чок болдурар сорулганы император прокуратура органнарының мурнунга тургускан.
Россия Федерациязының прокуратура ажылдакчызының хүнүнге тураскааткан байырлыг хурал Тыва Республиканың прокуратуразының чаа бажыңының хуралдаар залынга январь 13-те болуп эрткен. Тыва Республиканың прокурору Сергей Дябкин республиканың прокуратуразының ажылдакчыларынга Россия Федерациязының прокуратура ажылдакчызының хүнү-биле байыр чедирип, күрүнениң болгаш хамаатыларның эрге-ажыктарын камгалаар талазы-биле кызымак ак сеткилдиг ажылы дээш өөрүп четтиргенин илередип, оларның ал-боттарынга болгаш өг-бүлелеринге аас-кежикти күзээн.
Профессионал ажыл-чорудулгазынга шылгараан ажылдакчыларынга, прокуратура органнарынга үр ажылдап, күрүнениң болгаш хамаатыларның эрге-ажыктарын камгалаарынга улуг үлүг-хуузун киирген хоочуннарынга Россия Федерациязының прокуратуразының бедик шаңналдарын байырлыы-биле тывыскан. “Россия Федерациязының прокуратуразының хүндүлүг ажылдакчызы” хөрек демдээ болгаш РФ-тиң Чиңгине прокурорунуң Хүндүлел бижии-биле информастыг технологиялар болгаш информация камгалалының килдизиниң начальниги Дмитрий Григорович, “Россия Федерациязының прокуратуразының хоочуну” медаль-биле ТР-ниң прокурорунуң улуг дузалакчызы, юстицияның улуг чөвүлекчизи Евгений Черепанов, “Хоойлуга шынчы чорук” медальдың ийиги чергези-биле Чөөн-Хемчик кожууннуң прокурору Адыгжы Маспык-оол шаңнатканнар.
Профессионал ажыл-чорудулгазынга бердингени, албан-хүлээлгелерин бедик деңнелге күүсеткени, прокуратура органнарынга хөй чылдарда ажылдааны дээш Тыва Республиканың прокурорунуң дужаалы-биле республиканың прокуратуразының бөлүк ажылдакчыларынга акша шаңналдарын тывыскан.
Тываның Баштыңы Владислав Ховалыг республиканың прокуратуразының ажылдакчыларынга Россия Федерациязының прокуратура ажылдакчызының хүнү-биле байырны чедирип, күрүнениң болгаш хамаатыларының эрге-ажыктарын камгалаарынга чедиишкиннерни күзеп, оларның ак сеткилдиг кызымак ажылының ачызында Тывада эң ылаңгыя экономиктиг кем-херек үүлгедиглери эвээжеп турарын демдеглээн. Прокуратура органнарынга хөй чылдар дургузунда үлегер-чижектиг ажылы дээш ТР-ниң Баштыңының чарлыы-биле “Тыва Арат Республиканың ССРЭ-ниң составынче эки тура-биле киргениниң 80 чылы” юбилейлиг медаль-биле прокуратура органнарының хоочуннары Юрий Александрович Бридненко, Даш-оол Кыстааевич Ондар олар шаңнатканнар.
ТР-ниң Дээди Хуралының Даргазы Каң-оол Даваа база Тываның прокуратура ажылдакчыларынга Россияның прокуратура ажылдакчызының хүнү-биле байырны чедирип, ажылынга чедиишкиннерни күзеп, албан-хүлээлгезин күүседиринге шылгараан ажылдакчылар Урана Борбак-ооловна Ооржакка, Вадим Толаанович Кызыл-оолга Өөрүп четтириишкин бижиктерин тывыскан.
Прокуратура органнарынга албан-хүлээлгезин хөй чылдар дургузунда үре-түңнелдиг, үлегер-чижектиг күүседип чорааны дээш Тыва Республиканың прокуратуразының Хүндүлел самбыразынче ат-сывын, чуруктарын киирер хүндүлүг шаңналга хоойлужудулганы сагыырын хайгаараар болгаш коррупцияга удур килдистиң начальниги Владислав Пеняев, Бии-Хем кожууннуң прокурору Лилияна Доңгак, республиканың прокуратуразының федералдыг хоойлужудулганы сагыырын хайгаараар килдистиң улуг прокурору Айрана Шаравии, Кызыл хоорайның прокуратуразының кол специализи Долчанмаа Моңгуш төлептиг болганнар.
Россияның кызыгаар шериглериниң Кызылда отрядының “Кызыгааржы” ыры-хөгжүм ансамблиниң ыраажыларының патриотчу ырылары Россия Федерациязының прокуратура ажылдакчызының хүнүнге тураскааткан байырлыг хуралды улам байырланчыг хөөн киирген.
Ш. МОҢГУШ.
Буян Ооржактың тырттырган чуруу.
«Шын» №1 2025 чылдың январь 16
