ШАЛЫҢНЫҢ ЭҢ КУДУКУ ДЕҢНЕЛИ КӨДҮРЛҮР
Хакас Республика болгаш Тыва Республика талазы-биле Күрүнениң күш-ажыл инспекциязының дыңнадып турары-биле алырга, Россияның Президентизиниң Чарлыынга дүүштүр 2026 чылдың январь 1-ден шалыңның эң кудуку деңнели бо регионга көдүрлүр. Тыва Республикага 51475,7 рубль апаар. Бир эвес ажылдакчының ажыл төлевириниң хемчээли оон эвээш болур болза, ону шалыңның эң кудуку деңнелинге чедир ажыл берикчизи көдүрер ужурлуг.
ШӨЛЭЭЛЕР ГРАФИГИ
2026 чылда шөлээ графигин ажыл берикчилери 2025 чылдың декабрь 17-ге чедир тургузар ужурлуг.
18 хар чедир назылыг үштен хөй ажы-төлдүг, Россияның хүндүлүг донорлары, Чернобыль айыыл-халавын чайладырынга киришкеннер дээш өске-даа чиигелделиг ажылдакчылар шөлээни боттарынга таарымчалыг үеде ап болур.
Шөлээ графигин өй-шаанда тургуспааны дээш, ажыл берикчилери административтиг харыысалгага онаажып болурлар.
СООК ҮЕДЕ АЖЫЛДЫ ОРГАНИЗАСТААРЫ
Ажыл берикчилери соок үеде ажылды организастаарда, РФ-тиң Күш-ажыл хоойлужудулгазын сагыырын Хакас Республика болгаш Тыва Республика талазы-биле Күрүнениң күш-ажыл инспекциязы сагындырып турар.
Соок бажыңнар иштинге болгаш даштыгаа ажылдарга медицина көргүзүглери ёзугаар кадыы эки ажылдакчыларны ажыл берикчизи хаара тудар ужурлуг. Оларның соок бажыңнар иштинге болгаш даштыгаа ажылдаан үезинде дыштаныр база чынныр чурумун күш-ажылдың хоойлужудулгада көрдүнген негелделеринге дүүштүр тургузар.
РФ-тиң Күш-ажыл хоойлужудулгазында көрдүнген негелделерни сагывааны дээш, ажыл берикчизи административтиг болгаш кем-херек кеземчезинге онаажып болур.
Бистиң корр.
“Шын” №50 2025 чылдың декабрь 25