Бо чылын ТАР-ның ССРЭ-ге каттышканының 80 чылдаан оюн демдеглеп турар болгай бис, ынчангаш сезен чыл бурунгаар чуртталга кандыг турган чоор деп сактып бодай бээр сен. Ол үелерде сумулар чаа хөгжүп, мал, чер ажылы сайзырап эгелээн. Ынчан машина, техника шуут ховар турган. Көдээ ишчилер буга суун бадырып, картофель-ногааны тарып, бүгү ажылды хол-биле кылып турган. Мөрен суурнуң чагырыкчызы Анатолий Кыргысович Доржунуң удуртулгазы-биле сумунуң чону буганы хол-биле каскаш, суун бадыргаш, тараазын тарып турганнар.
Кырган-ававыс тарааны хооргаш, соктаашка соктааш, холу-биле дээрбедээш, биске тыва далганны кылып берип турду. Школачы үевисте ол чаагай хоорган тарааны-ла чип өстүвүс. Тыва далган кижиниң организминге ажыктыг, эң-не хоолулуг чем болгай. Ынчангаш-ла ол үениң кижилериниң кадыы быжыг чүвези ында ирги бе.
Бажың-балгат тудуу база колдуунда хол-биле туттунар турган. Улуг чудуктарны холу-биле чонуп турар боор чүве. Ол үениң кижилери дыка-ла ажылдаар чораан. Аныяк-өскенни күш-ажыл-биле кижизидип чораан. Ынчангаш бо үениң хоочуннары ындыг кижизидилгени алган болгаш, кара ажылдан чалданмас, шуптузун боттары кылып алыр. Мен ам назылай-даа берген болзумза, бажыңымда шупту ажылды бодум кылып алыр-дыр мен. Огородум кажаазы үрели бээрге, 68 өргенни тургузуп алдым. «Кыры шимчээрге, хырын тодар» деп үлегер домакта ышкаш картофельди база бодум тарааш, чайладыр суггарып тургаш, эки дүжүттү ажаап алыр-дыр мен. Кижиниң холу-буду шимчеп-ле чоруур болза, кырыыры-даа уттундурар, омак-сергек-даа болур сен.
Чечекмаа САДИ, ТР-ниң алдарлыг ажылдакчызы.
Эрзин кожуун, Мөрен суур.