Делегейниӊ 28-ки тускайлаттынган делгелгези биле «Күш-ажылдыӊ айыыл чогу болгаш камгалалы 2024» деп ажыл-агыйжы шуулган Москва хоорайга декабрь 3–6 хүннеринде болуп эрткен.
Ажыл кылып турар кижиге айыыл чок байдалды хандырар талазы-биле ажылчыннарга камгалал эдилелдерин бээриниӊ чуруму өскерилген.
Ооӊ мурнунда хуу камгалал эдилелдерин даӊзы ёзугаар берип турган. Ол дүрүм ам эргижирээн. 2025 чылдыӊ январь 1-ден тура Чаӊгыс аай хевирниӊ нормаларын ажыглаар.
Чурттуӊ шупту компаниялары күш-ажылдыӊ камгалал эдилелдерин чөптүг арга-биле бээр чаа нормаларже шилчиир. Тодаргайлаарга, ажылчын кижини камгалаар чүүлдерни бээрде, кылып турар ажылыныӊ хоралыг, айыылдыг талазын, агаар-бойдустуӊ байдалын барыымдаалаар.
Күш ажылдыӊ айыыл чок болурунга, ооӊ камгалалынга тураскааткан шуулган — Россияныӊ болгаш СНГ чурттарыныӊ ажыл-агый адырларыныӊ аразында улуг болуушкун.
Экология болгаш өрт айыылындан камгалаар, күш-ажылга айыыл чок байдал тургузар, коллективти болгаш ажылчын бүрүзүн чогуур эдилелдер-биле хандырар айтырыгларны шуулганга сайгарып чугаалашкан.
Амгы үениӊ чогаадыкчы чаартыкчы аргалары-биле кылган күш-ажылдыӊ камгалал эдилелдерин делгелгеге көргүскен.
Эки шынарлыг камгалал эдилелдерин бүдүрүп турар заводтарны, фабрикаларны, подряд организацияларын шилип алыр талазы-биле бо хемчег эптиг болган.
Чурукту интернет четкизинден хоолгалаан.
