Октябрь 12-де Улуг-Хем кожууннуң төвү Шагаан-Арыгда “Азия төвүнүң көшкүн чоннарының сесерлиинге” тыва чаның баг адар хевиринге командалар аразынга “хана-хана” оюну болуп эрткен. Аңаа Чаа-Хөл, Улуг-Хем, Тес-Хем, Таңды, Чөөн-Хемчик кожууннарның болгаш Кызыл хоорайның командалары киришкен.
Шаандан тура көшкүн амыдыралдыг чораан өгбелеривис эрниң эрезин ылавылап алырда, үш адаанныг оюн – хүреш, аът чарыжы база ча адарынга маргылдааларны эрттирип чораан. Амгы үеде ылаңгыя ча адарынга маргылдаа нептереңгей апарып, кандыг-даа байырлалдарга тураскааткан спортчу хемчеглерниң онзагай каастакчызы апарган. Чылдан чылче тыва ча адарынга сонуургалдыг эр-даа, херээжен-даа спортчуларның саны көвүдеп турары, аразында командалар болуп алгаш, адааннажып ойнап турары ооң бадыткалы.
Шак ындыг ээлчеглиг маргылдааны Улуг-Хем кожуунда “Азия төвүнүң көшкүн чоннарының сесерлиинге” эрттиргени киржикчилерниң хей-аъдын улам көдүрген. Тыва хевин чоргаар кеткеш, кирижин тырткаш, согунну үндүр адып турган спортчу бүрүзү ада-өгбелериниң ойнап чораан ук-төөгүлүг оюнунда адааннажып турарын чоргаарал-биле медереп билип турганы билдингир. Оларның салгалдары бо үндезин тыва оюнну дөмей-ле ойнай бээринге бүзүрел улуг. Ынчангаш тыва ча адарының баг кагар хевирин нептередири чугула.
Шагаан-Арыгга болган маргылдааның түңнелинде командалар аразынга “хана-хана” оюнга Кызыл кожууннуң командазы тиилеп үнгеш, бирги черни чаалап алгаш, 30 муң рубль-биле шаңнаткан. Ийиги черни Сүт-Хөл кожууннуң командазы ээлээш, 20 муң рубль-биле шаңнаткан. Үшкү черге Бай-Тайганың командазы төлептиг болган. Олар 10 муң рубльди алган. Херээжен багжыларга чаңгыстың аразынга болган маргылдааның тиилекчилерин 8-ке чедир шаңнаан:
Чөөн-Хемчиктен Байлак Монгуш тиилекчи болган.
II черни – Таңдыдан Ай-кыс Монгуш,
III черни – Тес-Хемден Чимис Кыргыс,
IV черни – Чаа-Хөлден Марта Монгуш,
V черни – Бай-Тайгадан Аржаана Мортуй-оол,
VI черни – Чаа-Хөлден Аялга Дангыт-оол,
VII черни – Чаа-Хөлден Эллада Доктугу,
VIII черни – Тес-Хемден Азияна Намдал алган.
Шаңналдыг черже кирген багжылар 500-тен 6500 рубльга чедир тус-тузунда акша шаңналдарын алган.
Бистиң корр.
Чуруктарны маргылдааның көрүкчүзүнден үлешкен.
“Шын” №79 2024 чылдың октябрь 16
