Күскү шериг келдириишкинин бир ай соңгаарлаткан.

Бистиң чуртувуста чаңчыл болган күскү шериг келдириишкини бо чылын ноябрь 1-ден тура эгелээр. Ол дугайында Чарлыкка РФ-тиң Президентизи Владимир Путин ат салган. Бо чылын Российжи Армияже хуусаалыг шериг албан-хүлээлгезин эрттиреринче кыйгыртыышкын ооң мурнунда чылдарда дег эвес, бир ай орайтап эгелээр.

Бо удаада шеригже 120 муң хире шериг назылыг хамаатыларны кыйгыртыр, ук сан-чурагай эрткен чылдың күскү келдириишкин-биле деңнээрге, 7500 кижи эвээш болуп турар.

Шеригже 18-тен 27 хар чедир назылыг, шериг курлавырында турбайн турар болгаш “Шериг албан-хүлээлге болгаш шериг эрттирилгезиниң дугайында” хоойлу езугаар шериг хүлээлгезин эрттирер ужурлуг хамаатыларны кыйгыртыр.

А октябрь 1-ден тура шериг албан-хүлээлгезиниң хуусаазы доосту берген солдаттарны, матростарны, сержантыларны болгаш старшиналарны шериг албанындан халаштырар деп Чарлыкта айыткан.

Бо шериг кыйгыртыышкыны Украинада тускай шериг операциязынга кандыг-даа хамаарылгазы чок дээрзин Генералдыг штаб тодараткан. Кандыг-даа мергежилдиг болза, шеригже кыйгырткан оолдар чурттуң кызыгаарынга шериг албанын эрттирер.

Хүндүскү салбырларда өөренип турар студентилерни шеригже кыйгыртпас, оон аңгыда өске-даа хоойлу езугаар шериг албанындан хостаттырар азы соңгаарладыр ужурлуг хамаатыларның ук эргелери ол хевээр кадагалаттынып арткан.