Чаа чылдың дыштанылга хонуктарында Россия Федерациязының Президентизиниң Сибирь федералдыг округта бүрүн эргелиг төлээзи — «Күзелдер Шивизи» бүгү-российжи акциязының киржикчилери — беш уругнуң күзелдерин боттандырарынга дузалаан.
Тыва Республиканың төвү Кызыл хоорайның чурттакчызы, беш харлыг Саша хөгжүм дыңнаарынга, танцылаарынга, чуруктарлыг номнар көөрүнге ынак. Ол ышкаш машиналарның аңгы-аңгы хевирлерин болгаш эптээр конструкторларны чыып турар. Бүрүн эргелиг төлээниң ачызында ол ийи коллекцияны алган: ооң ойнаар машиналарынга элээн каш машина немешкен, а чаа конструктору-биле машиналарынга гаражты чайлыг тудуп болур.
Хакас Республикадан сонуургак болгаш шимченгир оол — беш харлыг Михаил ылаңгыя чүък сөөртүр узун поездилерни дыка сонуургаар. Ол боду ойнаар демир-оруктуг база локомотивтерлиг болурун күзээн. Бүрүн эргелиг төлээниң даалгазы-биле Миша күзеп чорааны белек – улуг демир-орукту алган.
Красноярск хоорайдан он бир харлыг Кирилл арыг агаарга дыштанырынга, чайганырынга ынак. Оол бүрүн эргелиг төлээден белек кылдыр кыштың соок айларында бажыңынга дыштанып, чайганып олурарынга эптиг “кокон” сандайны алган.
Алтай крайның Барнаул хоорайдан хөй талалыг салым-чаяанныг, спортчу Артур хөккей ойнаар дериг-херекселдерлиг болуксап чораан. Хөккейден аңгыда, көдээ ажыл-агый болгаш техника аймаан, ылаңгыя мотоциклдерни ол сонуургаар. Бүрүн эргелиг төлээ 2025 чылдың төнчүзүнде Күрүне Чөвүлелиниң хуралының мурнунда, Артурнуң күзелин бижээн шарны елкадан дүжүрүп алгаш, каш хонук эрткенде, Артурну, ооң авазын болгаш дуңмазын «Титов Арена» хөй талалыг спортчу комплекске болуп эртер «Динамо-Алтай» хөккей командазының оюннарынче чалаан. Артур күзээни ышкаш хөккей ойнаарда кедер камгалал бөрттү болгаш ойнакчылардан тураскаалдыг белек — команда кежигүннериниң аттарын салган футболканы алган.
15 харлыг Анатолий — Донецктен. Ооң сонуургалы: өөредилге, компьютер болгаш фитнес, ылаңгыя батутка шураары. Шериглерниң каттышкан бөлүүнге Россия Федерациязының Истелге комитединиң Шериг-истелге эргелелиниң ажылдакчыларының деткимчези-биле Анатолий Серышев элээди оолга бажыңга ажыглаар батутту белек кылдыр сөңнээн.
Тайылбыр:
Россияның Президентизи Владимир Путинниң эгелээшкини-биле 2018 чылда «Күзелдер Шивизи» акция эгелээн. Төлевилел амыдыралдың берге байдалынга таварышкан уругларга Чаа чылдың хуулгаазын болуушкунун боттандырарын күзеп чоруур улусту хаара тудуп турар. 3 хардан 17 харга чедир назылыг инвалид уруглар, өскүс уруглар, эвээш орулгалыг өг-бүлелерниң ажы-төлү база тускай шериг операциязында киржип турар шериг албанныгларның өг-бүлелериниң уруглары база ЛУР, ДУР, Запорожье, Херсон областарда чурттап турар уруглар төлевилелде киржип турар. Сөөлгү чеди чылда 320 муң ажыг уругларның күзелдерин боттандырган.