Тускай шериг операциязы болуп эгелээнден бээр чон аразында кандыг-даа чугаалар тарап, ниитилелди дүвүредип турар. Чамдык дамчыыр чугаалар үе эрткенде шын, а бир чамдыызы көңгүс шынга дүүшпес-даа болур. Сөөлгү каш хонукта чон аразында «Долу эвес мобилизацияның ийиги чалгыы болур дээн-дир» деп дамчыыр чугаалар чон аразында дыргын тарай берген. Шериг албан-хүлээлгелиг эр улуска-даа, оларның өг-бүлелеринге, ада-иелеринге, ажы-төлүнге-даа бо айтырыг дүвүрелди оттурупкан.
Бо дүвүрел чүгле Тывада эвес, а бүгү Россияда чалгып турар. Ынчангаш РФ-тиң Президентизиниң парлалга албанының даргазы Дмитрий Песков ук дүвүрелди шынга дүүшпес деп чарлаан. Ооң чугаалап турары-биле алырга, чуртка мобилизация чарлаар дугайында чугаа чорбайн турар.
Долу-даа, долу эвес-даа мобилизацияже чонну хаара тудары планда көрдүнмээн, а керээ езугаар шериг албан-хүлээлге эрттирер күзелдиг хамаатыларны тус черлерде шериг комиссариаттарында хүлээп ап турар. Керээ чарып алгаш, албан-хүлээлге эрттирери дээрге-ле, дорт тускай шериг операциязынче баары эвес-тир. Керээ чарып алган хамаатының тускай шериг операциязынга киржир-киришпези бодунуң эргезинде. Россия девискээринде шериг кезээнге-даа ажылдап артып каап болур эргелиг.
Тыва Республиканың шериг комиссариадының шериг албан-хүлээлгеже хамаатылар чыыр пунктузунуң даргазы, капитан Алексей Шовкуненконуң медеглээни-биле алырга, керээ езугаар шериг албан-хүлээлге эрттирер күзелдиг хамаатыларны чыыр ажыл ам-даа уламчылап турар. Керээ чарып, шериг албан-хүлээлгезин эрттирер дээн хамаатылар күзелдии-биле кээп турар.
«Керээ езугаар шериг албан-хүлээлге эрттиреринге, бир болза ооң мурнунда шериг албан-хүлээлгезин эрттирип каапкан, бир болза дээди болгаш ортумак өөредилге черин доозуп турар, 18 хардан өрү назылыг эр улус хамааржыр. Оон аңгыда, бир чылдан хөй хуусаага шериг комиссариады-биле керээ чарган хамааты чаңгыс катап 195 муң рубль төлевирни алыр. Ай санында алыр шалыңы керээ чарып алгаш, чоруур хоорайының кезээнден хамааржыр. 30 муңдан 150 муң рубльга чедир болур. А бир эвес амгы үеде болуп турар тускай шериг операциязынга киржир болза, айда 200 муң рубль шалыңныг болур» – деп, Алексей Шовкуненко тайылбырлаан.
Керээ чарып алгаш, шериг албан-хүлээлгезин эрттириксээн хамаатылар, бир болза, чурттап турар кожуунунда шериг комиссариадынга, бир болза Кызыл хоорайга шериг комиссариадынга баргаш, билдириишкин бижиир. Комиссия көрген соонда, бир эвес шилилгени эрте бээр болза, эмчи шинчилгезин эртер. Ооң соонда мага-боттуң күш-шыдал талазы-биле шылгалда дужаар. Ол чадаларны эрткен соонда, ТР-ниң шериг комиссары керээ чарар дугайында атты салыр.
Керээ чарып, шериг албан-хүлээлге эрттириксеп турар хамаатылар дараазында дугаарже долгап болур: 8(922)459-63-58 азы
8(3942)238-00-01.
Кызыл хоорайның Абаканская кудумчузунуң 45 дугаарлыг бажыңы.
/ Айдың ОНДАР белеткээн.
