Тываның хөй-ниити палатазынга хамаатыларның соңгулда үезинде эрге-ажыктарын регион девискээринге мониторингилээр штабтың хуралы болуп эрткен. Аңаа соңгулдалар үезинде хайгааракчыларга хамаарыштыр чаа дүрүмнерни хүлээп алган.
Хөй-ниити палатазының Аппарат удуртукчузу Светлана Ощепкованың чугаалааны-биле алырга, регион бүрүзү тус черниң онзагай чүүлдерин өөренип көрүп тургаш, соңгулдалар үезинде хайгааракчыларга хамаарыштыр кандыг-бир шиитпирни үндүрер ужурлуг.
«Хайгааракчыларга хамаарыштыр ажылдап кылган дүрүмнү чөвүлел бадыткаар. Хөй-ниити хайгааракчыларын шилиириниң дүрүмү шыңгыыраан дээрзин сагындыраал. Оон аңгыда, даштыкының агентизи деп санадып турар хөй-ниити азы хууда хандырылгалыг организацияның хайгааракчы болур эргези чок. ТР-ниң Юстиция яамызының дузазы-биле амгы үеде хыналданы чорудуп эгелээн бис. Бир эвес кайы-бир организация өске агент деп санадып турар болза, ук организацияның төлээлери 2024 чылдың март 15–17 хүннеринде болур РФ-тиң Президент соңгулдаларынга хөй-ниити хайгааракчызы болур эргези чок» – деп, Светлана Ощепкова тайылбырлады.
2021 чылда хөй-нииити палатазы 9 организация-биле кады ажылдажылга керээзинге ат салган болза, бо 2024 чылда 21 организация-биле кады ажылдажылга керээзин чарып турар дээрзин Светлана Ощепкова демдеглээн. Хөй-ниити палатазының Аппарат удуртукчузунуң оралакчызы Баян-Доржу Сат удавас болур Президент соңгулдаларынга хайгааракчылар белеткээр ажылдың канчаар чоруп турарының дугайында илеткелди кылган.
«Хөй-ниитижилер чаңгыс үеде 96 соңгулда участоктарын хайгаараар. Оон аңгыда, Ак-Довурак, Кызыл болгаш кожууннар төвүнде чагырга черлеринге, хөй чурттакчылыг сумуларда турар соңгулда участоктарынга видеохайгаарал турар. 96 соңгулда участогунуң ажылын көргүзүп турар ийи улуг видео панелин болгаш 12 ноутбукту кожары планда көрдүнген. Курлавырга 8 ноутбук турар. Оларның-биле чамдык соңгулда участоктарын хайгаараар. 2024 чылдың март 15–17 хүннеринде болур соңгулдаларга Тываның девискээринде соңгулда участоктарынга ниитизи-биле 500 ажыг хайгааракчы ажылдаар» – деп, Баян-Доржу Сат илеткээн.
Хөй-ниити палатазының хуралынга Тываның хууда хандырылгалыг организациялары болгаш хөй-ниити шимчээшкиннери-биле соңгулдаларга хайгааракчылаар дугайында дугуржулгага атты салган.
ТР-ниң юристер ассоциациязының даргазы Аяна Петровна:
– Бистиң организациявыс 10 ажыг чыл дургузунда соңгулдаларга хайгааракчылап келдивис. Тываның девискээринде турар соңгулда участоктарынга бистиң төлээлеривис турар. Дуржулгавыстан алгаш көөрге, даштыкы хамаатыларның талазындан хажыдыышкыннар турган. Олар боттарының капсырылгазын таварыштыр үндезин чок шынга дүүшпес медээлер, чуруктар болгаш видеолар тарадырын оралдажып турган таварылгалар бар. Шак-ла ындыг барымдаалар-биле шын туржур дээш, юристер база өөренип турар бис. Ынчангаш РФ-тиң юристер ассоциациязы дээди эртемниг юристеривисти тус черлерде соңгулда участоктарынче чорудар бис. Бөгүн ТР-ниң Хөй-ниити палатазы-биле кады ажылдажылга керээзинге адывысты салдывыс. 2024 чылдың март 15–17 хүннеринде болур соңгулдаларга бодувустуң үлүг-хуувусту киириштирер деп сөзүвүстү бергенивис ол.
А. ОНДАР.
Ада ТЮЛЮШТУҢ тырттырган чуруу.
“Шын” №8 2024 чылдың февраль 3
