Республиканың Баштыңы «Лунсин» КХН-ниң чаа удуртукчузу Дэн Голян-биле ажылчын ужуражылганы эрттирген. Ужуражылга үезинде ийи тала бирги ээлчегде регионнуң хөгжүлдезинче угланган социал төлевилелдерни боттандырарынче кичээнгейни хаара тудуп, экологтуг негелделерни сагыырынга кады ажылдаарының планнарын сайгарып чугаалашкан.
«Лунсин» КХН – Кыдаттың даг-тывыш холдингизиниң иштинде компания. Бүдүрүлгениң удуртулгазы регионнуң эрге-чагыргазы-биле идепкейлиг кады ажылдажылганы уламчылаарынга беленин илереткеш, ажылдакчыларының мурнунга хүлээлгелер күүселдезин хандырарын болгаш тус чер чурттакчыларынга боттуг хемчеглерни арттырарын чугаалаан. Бо хүнде «Лунсин» КХН республиканың эң улуг үндүрүг төлекчизи болуп артпышаан. Бүдүрүлгеде колдуунда тус черниң чурттакчылары ажылдап, шупту ажылчын күштүң 84 хуузун тургузуп турар.
«Бо ажылды ам-даа уламчылаары чугула: ажылчыннарның күш-ажылчы эргелерин сагыыр, бистиң кады боттандырар төлевилелдеривис республиканың болгаш Тожу кожууннуң чурттакчыларынга деткимчени бээр ужурлуг. Бүдүрүлгениң чаа удуртулгазы-биле кады ажылдажылгавыс чаа деңнелче үнүп келиринге идегээр мен»— деп, Владислав Ховалыг демдеглээн.
Дэн Голян 1987 чылдың сентябрьда төрүттүнген, Фучжоу университединге «даг херээ» талазы-биле бакалавр эртемни чедип алган. Кыдаттың даг-тывыш адырынга элээн каш кол албан-дужаалдарга ажылдаан. Өңнүг металлдар тывыжында база болбаазырадылгазында «Лунсин» бүдүрүлге 2005 чылда тургустунган болгаш, амгы үениң бүдүрүлге баазазы-биле чепсегленип, Россия рыногунуң кол бүдүрүлгелериниң аразында мурнуку черни ээлеп турар.
А. МОНГУШ.
Чурукту ТР-ниң Чазааның парлалга албанындан алган.
“Шын” №46 2025 чылдың ноябрь 27
