Тыва Республиканың Баштыңы Владислав Ховалыг Енисей Сибирин хөгжүдер Корпорацияның чиңгине директору Сергей Ладыженко баштаан бөлүк төлээлер-биле ажылчын ужуражылганы эрттирген.
Бо чылдың чазынында Красноярскыга болган экономиктиг шуулганга Енисей Сибирин хөгжүдер Корпорация-биле кады ажылдажылганың дугайында дугуржулганы Тываның Садыг-үлетпүр талазы болгаш Тыва Республиканың инвестиция хөгжүлдезиниң агентилели чарган турган.
Ужуражылгага Тыва Республиканың Чазак Даргазының оралакчызының хүлээлгелерин күүседип турар Олег Лукин болгаш Тыва Республиканың экономиктиг хөгжүлде болгаш үлетпүр сайыды Айдыс Сат база киришкен.
Сергей Ладыженко республикада ажыл-агыйжы идепкейжиишкинни демдеглеп, ол бүгүге авиахарылзаалар-даа салдарлыг болган чадавас деп бодунуң бодалын илереткен.
— Тыва дөгереге ажык болгаш чедингир апар чыдар. Бээр чедип алыры, маңаа ажыл-херек бүдүрери беленчээн. Аргыжылга харылзааларын, транспорт инфраструктуразын хөгжүдериниң талазы-биле айтырыгларны чугулалап көргенивис бистиң шынныывысты база катап бадыткап турар – деп, Тываның Баштыңы Владислав Ховалыг демдеглээн.
Тывада тургузуп турар онза экономиктиг девискээрге инвесторлар сонуургалын илередип турар дээрзин тыва партнерларга Сергей Ладыженко дыңнаткан. Ооң чугаазындан алырга, дыка хөй талалар инвестор болуксаан күзелин илергейлеп, тыва онза экономиктиг девискээрниң резидентизи болуксаанын илереткен болуп турар.
Енисей Сибириниң инвестицияларга сонуургалдыының адырынга бөгүн тургустунган сорулгаларның бирээзи – чоокку кожалар – Моол база Кыдат-биле импорт болгаш экспорттуң хемчээлдерин улгаттырары болур. Ооң-биле чергелештир бо чурттарже аргыжылганың оруктарын тутпаан шаанда, Сибирь регионнарының үре-түңнелдиг инвестиция политиказын тургузары берге.
Ужуражылганың киржикчилери Тываны таварыштыр Кыдатче автомобиль коридорунуң тудуун дүргедедири-биле кадагааты партнерлар-биле чугаалажылгага демин каттыштырар болуп дугурушканнар.
Бодунуң ээлчээнде Корпорация Тываның девискээрин таварыштыр эртер Төп-Евразийжи демир-орук коридорунуң техника-экономиктиг үндезилээшкининиң ажылдап кылыышкынынга киржир болган.
Енисей Сибирин хөгжүдер Корпорация болза, Красноярск крайның, Хакас болгаш Тыва республикаларның инвесторлары-биле инвестициялар болгаш ажылдар хаара тударының талазы-биле тускайжыттынган организация болур. Корпорацияның сорулгазы – регионнарның инвестиция политиказын дээштиг болдурары.
А. ХЕРТЕК белеткээн.
“Шын” №94 2023 чылдың декабрь 9
