Кызыл хоорайда Аныяктар өргээзинге дайынчы угланыышкынныг семинарга медицина эртемнериниң доктору, Күрүне Думазының депутады, «Кадык келир үе» деп «Чаңгыс демниг Россия» партиязының эгелээни төлевилелдиң координатору, тускай шериг операциязынга эки турачы эмчи кылдыр ажылдап чораан Дмитрий Хубезов баштайгы дуза кадарының билиглеринге чыылган чонну өөреткен.
Аңаа ТР-ниң өөредилге сайыды Елена Хардикова, ТР-ниң ИХЯ-ның сайыды Сергей Кондрашов, ТР-ниң Дээди Хуралының Даргазы Каң-оол Даваа, Тываның медицина колледжизиниң директору Саида Моңгуш дээш республиканың аңгы-аңгы адырларының төлээлери 80 ажыг кижи хемчегге кээп киришкен.
Ийи хүн дургузунда үргүлчүлээн хемчег «Чаңгыс демниг Россия» партиязының эгелээшкини-биле болган. Ооң соонда республика девискээринге ук билигни тарадыры көрдүнген. Ынчангаш шагдаалар, эмчилер, дайынчы шериглер, хууда сайгарлыкчылар, башкылар, кижизидикчи башкылар, культура ажылдакчылары дээш Тываның аңгы-аңгы адырларында ажылдап чоруур хамаатыларны хаара туткан чылдагааны ол.
«Республикавыста медицина эртемнериниң доктору, профессор, Күрүне Думазының депутады Дмитрий Хубезов коллегам аалдап чедип келген. Ооң келген сорулгазы – чонувуска билиг бээри. Бир кижи айыыл-халапка таваржы бээр болза, канчаар дуза кадарын билип алыры кончуг чугула. Эмчи эвес-даа болза, берге байдалга таварышкан кижиге канчаар шын дузалаарын өөредип турары ол. Кандыг-даа кижиге дыка чугула билиглер-дир. Ону билбес болза, ажы-төлү-даа чемге хара бээр болза дузалап шыдавайн барып болур. Ажы-төлүн, чоок улузун чидирип албазы-биле, баштайгы дуза кадарының билиглерин шиңгээдип алыры чугула. «Дүрген дуза» чалапкаш, специалистерниң келиринге чедир баштайгы дузаны кадары чугула. ТШО-нуң хоочуну, арга-дуржулгалыг эмчиниң Тывага аалдап келгени биске дыка эки болду» – деп, Тыва Республикадан Күрүне Думазының депутады Айдың Сарыглар чугаалады.
«Баштайгы дуза кадар ажылдарны кадык камгалалы харыылаар, ынчалза-даа адыр бүрүзү, кижи бүрүзү ук билиглерни билген турары чугула. Чоокта чаа РФ-тиң баштайгы дуза кадар дугайында хоойлуга өскерлиишкиннер киирген, аңаа атты сайыт салган. Ол хоойлу 2024 чылдың сентябрь айда күш кирер. Бир эвес мээң-биле бир-ле озал-ондак болур болза, ажы-төлүм болгаш өөм ишти баштайгы дуза кадып шыдавас болза, багай ышкажыл. Ынчангаш кижи бүрүзү баштайгы дуза кадар билиглерни шиңгээдип алыр болза эки.
Россияның шупту регионнарынга шак мындыг өөредилгелерни эрттирип эгелээн бис. Тыва он дугаарында деп болур» – деп, Дмитрий Хубезов чугаалады.
Хемчегниң кол спикери Дмитрий Хубезов чыылган чонга баштайгы дуза кадарының дугайында видеороликтерни көргүзүп тургаш, кыска болгаш билдингир тайылбырны кылган.
«Кадык келир үе» Россия чергелиг төлевилел чоннуң чаагай чоруу дээш эгелээн дээрзин сагындыраал.
Айдың ОНДАР.
Чуруктарны интернет четкизинден алган
«Шын» №41 2024 чылдың июнь 5
