Бо чайын кадыкшылывысты эмнедип алыры-биле, «Серебрянка» профилакторийге дыштандывыс. Бо сезонда республиканың аңгы-аңгы кожуун, суурларындан 70 ажыг кижи эмнедип, дыштанып келген. Колдуу 40, 50, 60 хар үези назылыг чартыктаан, сөөк-даяа аарыг улус болдувус.
«Серебрянканың» улуг эмчизи Оксана Ивановна Гостюхинаның удуртулгазы-биле аңгы-аңгы аарыглар эмчилери ында ажылдап турар: профилакторийниң эргелекчизи Мария Викторовна Саган-оол, эмчи сестразы Аляна Каң-ооловна Содунам, кардиолог Чинчи Байыр-Хаа, невролог Чимис Карандаш, физиотерапевт Салбакай Маадыр-оол, токтуг аппараттар сестразы Марина Содунамовна дээш оон-даа өске.
Аңаа дыштанып барган кижи бүрүзү аарыының аайы-биле эмчилерге кирип, курорт карточказынга бижиткеш, шактар аайы-биле эмнээшкинни эгелээр. Ток база суг-биле эмнээр аппараттарга, ванналарга кирип эмнедип турдувус.
Дыштанып келгеннерни бүрүткеп чыттырар эмчи Эльдар Любомирович, эмчи сестразы Вика Викторовна аарыгның төөгүзүн долдурар, физиотерапевт Игорь Васильевич Кандан хөй-ле улусту эмнеп четтигип турар. Аарыг кижилерге массаж кылыр эмчи Муза Молдургаевна Сат.
Өрээливисти аштап-чуп, агаарладып, кварцтап бээр уруувус Аэлита Сарыг-ооловна. Санитаркалар шупту аштаныр арыг-силиг кыстар, эр хейлер.
Поварларның ажылы мактаксанчыг, кылган чеми амданныг, хоолулуг. Улуг повар Айдың Сундуй, дузалакчызы Чейнеш Сат.
Дыштанып баргаш, субботада дыка солун таныжылга кежээзин организастадывыс. Дөрт куплет ыры сөзү чогаадыптарымга, аялгазын Чаймаа башкы чогааткаш, баянга ойнаан. Шупту чаа ырының сөзүн өөренип алгаш, ырлаштывыс. Бодун таныштырарда, кижи бүрүзү бир номер күүседир болган. Аравыста кандыг-даа талантылыг улус бар болду. 80 харлыглар аразынга кожамыктар мөөрейи чарлаан. Тээлиден Надежда Чудук, Чаа-Хөлден Оюмаа Балчы, Кызыл-Мажалыктан Зоя Саая база мен тергиин кожамыктааш, шаңнаттывыс.
Аравыста ыраажылар, баянчылар дээш кандыг-даа талантылыг улус илереп келди. Чеди-Хөлден чаңгыс классчылар Анатолий Донгакович Кенден биле Надежда Тюлюшовна Оюн бирээзи баянга үдевишаан, деңге ырлажыр, артистерден артык ырлаар болдулар. Мөңгүн-Тайгадан шыдыраа башкызы Александр Иргит кожамык мөөрейиниң тиилекчизи, оюн-баштак, дыка хөглүг.
«Серебрянкага» 15 хонук дыштандывыс. Чамдык улус 5–10-даа хонуктуң путевказын садып алгаш дыштанып турар-дыр. Бис-биле катай республиканың аңгы-аңгы кожууннарындан аарыг кижилер кадыкшылын эмнедип, быжыктырып турду. Ол дээрге Бай-Тайганың Кара-Хөлден Елизавета, Ак-Довурактан Рада Ооржак, Сүт-Хөлден Сай-Хоо Ондар, Чадаанадан Татьяна Кара-Сал, Хорум-Дагдан Адар-оол Монгуш, Кызыл-Мажалыктан Зоя Чоксумовна Ооржак, Сүт-Хөлден Ханды Монгуш-ооловна Ооржак, Чыргакыдан Лидия Намчыл-Доржуевна Ооржак, Турандан Татьяна Салбак олар-дыр.
Аъштыг-чемниг, арыг-силиг,
Авыралдыг «Серебрянка»
База катап чедип кээр бис,
Байырлыг че, Мөңгүн-Булак!
/ Чылбак МОНГУШ,
күш-ажылдың хоочуну, РФ-тиң хүндүлүг башкызы.
Авторнуң тырттырган чуруктары.
«Шын» №69 2024 чылдың сентябрь 11
