Мөнгүн-Тайга кожууннуӊ төп эмнелгези, Кызыл-Хаяныӊ девискээр эмнелгези сарлык кадарчыларыныӊ байырлалынга келген малчыннарга, чурттакчы чонга кадыын шинчидип алыр таарымчалыг байдалды тургускан.
Мобильдиг фельдшер-акушер пунктузунга эмчи Виктория Нас-Сурун, эмчи сестралары Марьяна Тумат, Мая Седен келген улустуӊ ханының базыышкынын хынап, хан анализин ап турда, майгында эмчилер коронавирус болгаш чумага удур тарылгаларны кылган. А кожууннуӊ кол эмчизи шинчидип келген малчыннарныӊ деӊзизин хынап, дурт-сынын хемчээп, терапевт эмчиниӊ билдилиг сүмелерин бергилээн.
Кадыкшыл бирги черде болганда, эмчи хайгааралында турар хоочураан аарыглыг улустан аӊгыда, күзелдиг кижи бүрүзү эмчилерге шинчидип, кадыын хынадып турган.
Эмчи шинчилгезин 65 кижи эртип алган. Коронавируска удур – 19, чумага удур 25 кадарчы тарыткан. ВИЧ хынаары-биле 19 кижиден анализти алган.
– Чоннуӊ хостуг-шөлээн үезин ажыглап, эмчи шинчилгезин эрттирип чедип келдивис. Терапевт, диш эмчизи, акушер-гинеколог специалистер келген. Хан анализинден кезек аарыгларны тодарадыры-биле, кожуун төвүнде болгаш Кызылда лабораторияларже чорудар бис – деп, кожууннуӊ кол улуг эмчизи Дугаар-оол Хертек тайылбырлаан.
Мобильдиг ФАП автомашинаныӊ ачызында кожууннуӊ Каргы, Мөген-Бүрен, Тоолайлыг сумуларында чурттап турар малчыннарныӊ кадыыныӊ байдалын улаштыр шинчип хынаары – төп эмнелгениӊ планында.