Кадын кыстың сагыыр сес дүрүмү

Аксессуарларны шын шилиири.

1. Моюнга шарыыр аржыыл, сумка, кур дээн ышкаш чүүлдер шупту чүүлдешкек, бот-боттарынга тааржыр болур ужурлуг.

2. Садыглаашкыннарны бодамча чок кылбас. Хеп садыы баар мурнунда бар хевиңерни четчелеп, чүү четпезин, чүнү садып алырын экидир боданыңар. Садар хевиңерниң даңзызын тургузуп алыңар.

3. Иштики хеп – силерниң овур-хевириңерниң чартыы дээрзин утпаңар. Бир эвес иштики хеп көзүлбес деп бодап турар болзуңарза чазып турарыңар ол. Размерин болгаш фасонун шын шилээн иштики хеп илдең эвес болур. Бир эвес шын эвес шилип алыр болзуңарза, иштики хеп силерниң дурт-сыныңарны өскертиптер.

4. Херээжен кижи бүрүзү кара платьелиг болур ужурлуг. Бодуңарга тааржыр кара платьеден садып алыңар. Ону силер каш-даа чыл иштинде кедер силер.

5. Өңгүр, чырык хеп далдаваңар.

6. Классика хептер херээжен кижиге ыяап-ла бар боор ужурлуг.

7. Чүгле шынарлыг хеп садар.

8. Арыпкаш азы семирий бергеш кедер хеп кажан-даа сатпаңар. Бодуңарга өй-тап хептен садып ап чоруңар.

"Шын" №56, 2023 чылдың июль 29