Декабрь 10-да Кызылдың 2 дугаар школазында “Алдын согун” спортчу клубка кадыы кызыгаарлыг спортчулар аразынга Инвалидтер хүнүнге тураскааткан республика чергелиг маргылдаа болуп эрткен.
Маргылдааны Республиканың адаптивтиг хевирлер талазы-биле спорт школазы “Кадык амыдырал” төлевилелди боттандырар сорулга-биле организастаан. Маргылдааның кол сорулгазы — коляскада олурар база даянгыыштыг спортчуларның аразынга спорттуң ча адар хевирин сайзырадыры база 2025 чылда маргылдааларга киржир шыырак спортчуларны илередири.
Школаның методизи Вячеслав Сымчаан, маргылдааның кол шииткекчизи Виктор Саржат-оол база секретары Чечен Саржат-оол маргылдааны ажыткаш, спортчуларга байырны чедиргеннер. Дүрүм езугаар маргылдаага чүгле белеткели шыырак 25 эр, херээжен спортчулар 18 метр хемчээлге, 2 хевирге шынарлыг база өйлүг күжүн хынап киришкеннер.
Түңнелинде, ча адарының шынарлыг хевиринге шаңналдыг черлерни дараазында коляскада олурар эр, херээжен спортчулар үлешкеннер: эр улус аразынга 1–3 черлерни Руслан Очур, Владислав Сат, Аганак Седип, херээжен улус аразынга 1–3 черлерни Айдасай Монгуш, Чечекмаа Ондар, Долгар Ондар.
Эр улус аразынга өйлүг адар хевиринге 1–3 черлерни Давид Монгуш, Владлен Түлүш, Айдаш Тумат алганнар. Маргылдааның холушкак хевиринге (шынарлыг, өйлүг) эр, херээжен спортчулар катай киришкеш, 1–3 черлерни Долаана Доюндуп, Ай-Хаан Торуш, Аржаана Ховалыг үлешкеннер. Шаңнал кирген спортчулар медальдар, дипломнар база белектерни алганнар.
Тускай шериг операциязының киржикчизи Ай-Хаан Торуш (тренери Чечен Саржат-оол) 2023 чылда Кемеровага база 2024 чылдың ноябрь 14–17 хүннеринде Сириуска “Чурт камгалакчыларының Кубогу” деп Бүгү-россия чергелиг ча адар маргылдааларга чедиишкинниг киришкен.
Кадыы кызыгаарлыг спортчулар аразынга ноябрь 10–18 хүннеринде Кыргызстанның төвү Бишкек хоорайга шыдыраага Азия чемпионады болган. Аңаа 7 чурттан 79 шыдыраачы аразынга Алдар Ооржак 3-кү шаңналдыг черни алган. Ол ышкаш ноябрь 15–17 хүннеринде Калининградка дыңнаары кошкак спортчулар аразынга Россияның Кубогу дээш хостуг хүреш маргылдаазы болган. Ол маргылдаага 125 килдиг мөгелер аразынга Эртине Түлүш 1-ги, 74 база 79 килдерге Экер Сат биле Байыр Ондар 2-ги черлерни алганнар. Түңнелинде, команда талазы-биле 3-кү черге төлептиг болганнар. Команданы тренер башкылар Артыш Доржу биле Евгений Дүвендей белеткээннер.
Үстүнде маргылдааларга шаңнал кирген спортчуларга база оларны белеткээн тренер башкыларга Инвалидтер хүнүн база декадазын таварыштыр шупту тыва чоннуң мурнундан быжыг кадыкшылды база бедик спортчу чедиишкиннерни күзедивис.
Алексей ЧАМБАЛ-ООЛ, хоочун спортчу.
“Шын” №96 2024 чылдың декабрь 14
