Тываның Баштыңы Владислав Ховалыгның даалгазы-биле республиканың шериг комиссариады тускай дериг-херексел-биле чепсегленген. Тускай шериг операциязының киржикчилериниң аразындан инвалид апарган шериг албанныг кижилерни ажылче хаара тудар аргаларның бирээзи – ажылчын олуттар-биле хандырары болур. Регионнуң Күш-ажыл болгаш социал политика яамызы «Тыва Республикага чурттакчы чонну ажылга хаара тударын деткиири» күрүне программазы-биле коляскалыг инвалид шериг албанныг кижилерни ажылга хаара тударынга эптиг байдалдарны тургузар талазы-биле хемчеглерни боттандырган.
Шериг комиссариаттары коляскалыг инвалид кижилерниң аай-дедир шимчээринге эптиг тускай эт-сеп болгаш ортопедтиг сандайлар-биле кады бүрүн четчелээн компьютер комплектизин саткылаан. Ынчалдыр республиканың шериг комиссариаттары иттинер-тергелиг шериг албанныгларга немелде ажылдаар олуттарны ажыдар.
«Тываның Баштыңы Владислав Ховалыгның даалгазын күүседири-биле, республика бюджединден 1,8 млн. рубльди тускайлааш, садыглажылгага киржип, компьютер дериг-херекселдерин, принтерни, чогуур стол-сандайларны садып алдывыс. Дайынчыларывыска таарымчалыг ажылчын олуттарны тургузуп бээри-биле, эт-септи шериг комиссариаттарында коллегаларывыска хүлээдип бердивис. Күрүневистиң болгаш республикавыстың чаагай чоруу дээш ам-даа ажылдап шыдаар дайынчыларывыска хүндүткелди көргүзүп турарывыс ол» – деп, күш-ажыл болгаш социал политика сайыды Эдуард Сандан демдеглээн.
Тускай шериг операциязындан ээп чанып келген хоочуннарны болгаш оларның өг-бүлелерин ажылга хаара тударын деткиири – регионалдыг эрге-чагырга черлериниң кол сорулгазы. Регионнуң Чонну ажылга хаара тудар албанының ажылдакчылары, «Ада-чурт камгалакчылары» фондунуң салбырындан социал координаторлар болгаш специалистер бо ажылда идепкейлиг киржип турар.
2025 чылда «Россияда ажыл» шөлдүң регионалдыг Кадрлар төвүнче ажылче хаара тударынга дуза дилеп келген тускай шериг операциязының хоочун бүрүзүнге хостуг ажылчын олуттарны дыңнаткан база профугланыышкынны киирген хууда планны ажылдап кылган. Тускай шериг операциязының 68 хоочуннары (45,9 хуузу), ооң иштинде инвалид чеди кижи ажылды тып алганнар. Оларны тус чер чагыргаларынга, эмнелге албан черлеринге болгаш хууда компанияларда ажылдарже хаара туткан.
ТР-ниң Чазааның парлалга албаны.