МООЛ УЛУСТУҢ ТЫВЫЗЫК ТООЛУ
Эрте бурун шагда чүвең иргин. Чырык өртемчейге чараш болгаш угаанныг кыс чурттап чоруп-тур эвеспе. Бир-ле катап бо ховар дээн чараш кыс ховуга хөй мал-маганын кадарып чорда, экер-эрес, чыраа-саяк аъттар мунган, каас-коя хептиг үш аныяк эр халдып келген. Эрес эрлер-даа чүү боор, «Бистиң кайывыстың кадайы болур сен?» — дээш, аразында «Мени ал, мени ал» – дижип эгелээн. Эрлер чараш кыска ынакшылын сөглеп, «Меңээ кадай бол» – деп ээрежип-ле эгелээннер-дир.
Ынчаар орта, чараш кыс тургаш: «Үш чүкче чоруткаш, меңээ чок дээн чараш суй белектен эккелиңер. Кайыңарның эккелген белээ сеткилимге тааржыр болур, ол кижээ баар мен» — деп-тир.
Үш экер эр-даа чүү боор, үш аңгы чүкче чоруп каап-тыр эвеспе. Чиге барыын чүкче чорупкан эр анаа каракка көзүлбес чүвени көрүп кааптар, хуулгаазын көрүнчүк тып ап-тыр. Чөөн чүкче чоруткан эр хуулгаазын чындыр торгу тон самолет тып ап-тыр. Соңгу чүкче чораан үшкү эр өлген чүвени диргизиптер хуулгаазын эм үнүш тып алган.
Эрлер-даа чүү боор, чараш кыс-биле болчашкан черинге келгеш, хуулгаазын көрүнчүк-биле көрүп олурарга, ынакшаан чараш кызы өлүп калган бооп тур. Сүмелешкеш, тон-самолетка үжелээн олурупкаш, ынак кызынга ужудуп чедип келгеннер.
Үшкү эр-даа чүү боор хуулгаазын эм үнүжү-биле эмнеп тургаш, ынакшаан кызын диргизип алган-дыр эвеспе.
Чараш кыс үш экер-эрес эрлерниң кайызынга кадай кылдыр барган деп бодаар силер?
«Монголия» сеткүүлден Седип-оол ИРГИТ очулдурган.
Чурукту интернеттен алган.
"Шын" №52, 2023 чылдың июль 15