Эрткен чазын Тывага ниитизи-биле 2622 га шөлге картофель үрезинин олурткан. 2022 чылдың чайында республиканың девискээринге чаъс-чайык чегей-даа болган болза, картофельдиң дүжүдү хоомай эвес болган деп демдеглеп болур. “Ийиги хлеб” деп адаарывыс картофельдиң дүжүдү бир гадан 100 центнер. 2021 чылда картофельдиң дүжүдү бир гадан 110 центнер болган. Эрткен чылдыынга деңнээрге, 10 центнер эвээш.
Республиканың Көдээ ажыл-агый яамызының бо чылдың октябрь 17-де медээлери ёзугаар алырга, 2622 га картофель шөлүнден 26097 тонна картофельди республиканың көдээ ажыл-ишчилери ажаап алган. Эрткен чылдың ол-ла үезинде 27997 тонна картофельди ажаап алган турган. Ол дээрге 1900 тонна эвээш. Эрткен чайгы каңдаашкын картофельдиң багай эвес дүжүдүн ажаап өстүрүп алырынга көдээниң ажыл-ишчилеринге шоолуг-ла доктар болбаан, олар эрес-шудургу ажылдаан-дыр.
Бир эвес кожууннар аайы-биле алыр болза, картофельдиң дүжүдүн ажаап алганы мындыг янзылыг. “Ийиги хлебтиң” эң хөй дүжүдүн Кызыл кожууннуң ажыл-агыйлары ажаап алган – 4399 тонна. Бо кожууннуң ажыл-ишчилеринден картофель тарып өстүреринге Каа-Хем кожууннуң ажыл-ишчилери дудак чок болган – каш-ла тонна четпейн барган. Каа-хемчилер 4306 тонна картофельди ажаап алганнар.
Каа-Хем биле Кызыл кожууннарга деңнээрге, арткан кожууннарның картофелиниң дүжүдү, ылап-ла, шоолуг эвес. Бай-Тайга кожуун – 2684, Таңды – 2570, Улуг-Хем – 2495, Барыын-Хемчик 2143 тонна картофельди ажаап алганнар. Бо кожууннарның бирээзиниң-не ажаап алган картофели Каа-Хем биле Кызыл кожууннарның тус-тузунда ажаап алган дүжүдүнүң барык чартыы-ла хире.
Эрткен чайгы каңдаашкын картофельдиң дүжүдүнүң бо күзүн бедик эвезинге салдарлыг-даа болган болза, дараазында чүүлдү демдеглеп каары артык эвес боор. Эң ылаңгыя Кызыл кожууннуң тараачын-фермер ажыл-агыйлары сөөлгү чылдарда картофель олурткан шөлдерниң суггадынче кичээнгейни угландырып турар апарган. Суггаттыг шөлдер элээн хөй Сүт-Хөл, Барыын-Хемчик дээн ышкаш чамдык кожууннар картофельди суггарып ажаап өстүрер болза, магадылалдыг дүжүттү ап болурлар.
Тыва Республиканың Көдээ ажыл-агый яамызының медээлеринден Ш. МОНГУШ белеткээн.
Чурукту интернеттен алган.