Кызыл хоорайда хөй аал чурттаар бажыңда чурттап турар хоочун өг-бүле бис. Ногаа өстүрер чер бажың, участок чок болгаш картофель, ногаа аймаан күзүн, өртектер чүгээр турда, көдээ ажыл-агый ярмарказындан садып алыр чаңчылдыг бис. Сөөлгү ийи-үш чылда картофельдиң дүжүдү арай багай бооп турарында бе, өртээ элээн аартаан. А улуг садыгларда садып турар картофельдиң амдан-чимдени-даа чок, чымчавас-даа та кандыг сорттуң ногаазы чүве, ынчангаш садыглардан садып алыксавас апарган мен.
Эрткен дыштаныр хүннерде «Тываавтотранста» ажылдап турар чолаачы дуңмам Балгазында тараан картошказын ажаар, дузалажып чоруулуңар дээн. Таңдының картошказы чаагай болгай, ботка-даа бичии казып алгай-ла дээш чорупкан бис. Бо коллективтиң демниин аңаа көрдүм. Шупту өг-бүлелерин, ажы-төлүн эдертип алган келген. Олар чазын Балгазынның «Идегелдиң шөлү» деп ажыл-агыйның шөлдеринге картошка тарып каан. Чайын хөрзүнүн үлдүрертип, суггарып турганнар болду. Ынчангаш дүжүдү эки болган. Магалыг-ла чүве чорду, кижи боду казып турбас, трактор дургаар аңдарып чоруй баар. Кижи хөй болгаш, дүжүттү бичии-ле үе дургузунда чыыпкан бис. Бо-ла бүгүнү «Тываавтотранс» албан чериниң профэвилелиниң даргазы О.В. Эренчин удуртуп турар болду. Ында бистен өске коллективтер база бар-дыр. Ажыл-агыйжы коллективтер, өг-бүлелер шак-ла мынчаар деми-биле картофельди тарып алырга, эки чүве-дир деп көрдүм. Совет үеде база мындыг арганы ажыглап турганна болгай. Ылаңгыя хоорай чурттакчыларынга, дача чок улуска дыка эки боор чүве.
Ол демниг коллективтиң дүжүдүн ажаашкаш, бир шоодай картошкалыг чанып келдивис. Балгазынның картошказы-даа чаагай-дыр.
Зоя БАЛГАН-ООЛ, күш-ажылдың хоочуну.
Кызыл хоорай.
Чурукту интернеттен хоолгалаан.
«Шын» №39 2025 чылдың октябрь 9