Бо чылдың декабрь 8-те, Коррупция-биле демиселдиң бүгү-делегей хүнүнүң бүдүүзүнде, республика прокуратуразынга парлалга конференциязы болуп эрткен. Ооң ажылынга республиканың прокурору Сергей Дябкин, Россияның Истелге комитединиң истелге эргелелиниң удуртукчузу Константин Столбин болгаш Тываның иштики херектер сайыдының хүлээлгелерин түр күүседип турар Алексей Кежватов олар киришкен.
Каттышкан парлалга конференциязын хээли-биле холбашкан кем-херектерге, корум-чурум хажыдыышкыннарынга, регионнуң эрге-хоойлу камгалаар органнарының мурнунда салдынган сорулгаларга тураскааткан.
Парлалга конференциязын ажыдып тура, республиканың прокурору хээлиленир чорукка удур демиселдиң адырынга хайгаарал чорудар албан черлери доктаамал үндезинге сайгарылганы чорудуп, эрге-хоойлу камгалаар органнарның ажылын эдип-чазап турарын айыткан. Калбак ажыл-хемчеглерниң боттанылгазы бо адырга тодаргай түңнелдерни чедип алыр арганы берген.
Эрткен үе дургузунда прокурорлар хээлиленир чоруктуң 300 ажыг хажыдыышкынын илереткен. Коррупцияга удур бодунуң хүлээлгелерин күүсетпейн, хоругларны сагывайн турган 600 хире кижини тодараткан. Сагылга-чурум үрээшкинин болдурган 400 хире албан-дужаалдыг кижилерни харыысалгага онааган, бүзүрелди чидирген 3 кижини ажылындан үндүрген.
67 сая рубль ниити түңнүг когаралды дуглаарының дугайында хээли-биле холбашкан 20 кем-херек үүлгедиишкинин прокурорлар судче чоруткан. Янзы-бүрү херектерниң талазы-биле онааган торгаалдарның ниити түңү 1,5 сая рубль ашкан. Эрткен чылын сайгарып көрген херектер-биле катай 2 сая рубльди тырткан.
Конститусчу административтиг корум-чурум үрээшкиннериниң дугайында 14 херекти прокурорлар оттурган, ооң иштинде 1 херек – юридиктиг организацияның талазындан хоойлуга чөрүштүр шаңнаашкын болгаш мооң мурнунда албан хаап турган 13 кижини хоойлуга чөрүштүр ажылга хаара тутканы болур.
Хайгаарал албан черлери-биле эрге-хоойлу камгалаар болгаш контроль-хайгаарал чорудар оганнарның ажылынга хайгаарал чорудар ажыл уламчылап турар.
С.А. ООРЖАК,
Республика прокурорунуң улуг дузалакчызы.
“Шын” №94 2023 чылдың декабрь 9
