Дайынчы хөделиишкиннер девискээринде чаңгыс чер чурттугларывыска гуманитарлыг дузаламчы чыыр ажылдар уламчылавышаан.
Октябрь 25-те Федералдыг казна албан чериниң Тыва Республикада эргелелиниң ажылдакчылары 55-ки гвардейжи мото-адыгжы (даг) бригаданың снайперлеринге болгаш Улусчу фронтунуң Тывада салбырының төлээлеринге коллективтиң белеткээни дузаламчызын хүлээткен.
Федералдыг казна албан чериниң Тыва Республикада эргелелиниң удуртукчузу, Солаңгы Саая:
– Казна албан чери үш дугаар чыл «Бүгү чүүлдү тиилелгеже!» деп төлевилелде киржип тур бис. Бөгүн 3 мотоциклди хүлээдип турарывыс бо. Чазын база 2 мотоциклди чоруттувус. Дайынчыларның чугаалап турары-биле алырга, мотоциклдер бүдүү аргыжарынга, эм-дом болгаш аъш-чем аай-дедир дажыглаарынга эптиг. Чүгле мотоциклдер эвес, аңаа эдеринчи кылдыр техника септээр 3 комплект херекселдерни, дүлгүүрлерни база немей саттывыс. Оон аңгыда, 100 кылымал лааны коллегалар демнежип тургаш белеткээн. А ажы-төлүвүс чаңчыл болган «Дайынчыга чагааларны» бижээн.
Казна албан чериниң белеткээни гуманитарлыг дузазын хүлээнип ап тура, 55-ки гвардейжи бригаданың снайпери кыйгы ады-биле Ай-Хаан өөрүп четтиргенин илередип, удурланыкчыны тиилээринге чугула херек техниканы бергени дээш ук коллективке чедиишкиннерни күзеди.
«Дайынчы хөделиишкиннер девискээринге мотоцикл-биле аай-дедир аргыжарга, кончуг эптиг. Ажылдадыптарга-даа, даажы чок, дыка дүрген халдыр. Дайзынның девискээринче безин бүдүү киир халды бээр. Бо хол-биле кылган лаалар чылыгны, чырыкты бээр, чемни безин чылдып чиптер бис»– деп, Ай-Хаан немеди.
«Ниитизи-биле гуманитарлыг дузаламчы чыыр ажыл дайынчы хөделиишкиннер девискээринде чаңгыс чер чурттугларывыска чүгле материалдыг эвес, а моральдыг деткимче деп санаар мен. Гуманитарлыг дуза тиилелгеже бисти чоокшуладып турар. Ынчангаш дузаламчы чыып турар хамаатыларга, албан черлеринге Улусчу фронтунуң өмүнээзинден өөрүп четтиргенивисти илередир-дир мен. Гуманитарлыг дуза чыыр ажылдар ам-даа уламчылап турар. Кызыл хоорайның Тыва эки турачылар кудумчузунуң 3 дугаар бажыңында чыып турар. Харылзажыр дугаары: 2-10-50» – деп, Улусчу фронтунуң Тыва Республикада салбырының төлээзи Александр Буланкин чугаалады.
Айдың ОНДАР.
Ада ТЮЛЮШТУҢ тырттырган чуруктары.
«Шын» №82 2024 чылдың октябрь 26
