Июнь 21-де В. Көк-оол аттыг Национал хөгжүм-шии театрынга Тываның Медицина палатазының 10 чылдаанынга тураскааткан шуулган болуп эрткен. Аңаа ниитизи-биле республиканың аңгы-аңгы булуңнарындан 600 ажыг эмнелге ажылдакчылары киришкен. Республиканың медицина ниитилелинге байыр чедирери-биле, Россияның Эмчилер чөвүлелиниң президентизи Леонид Рошальдың даалгазы-биле чөвүлелдиң эрге-хоойлу талазы-биле албанының удуртукчузу Лилия Айдарова келген.
“Он чыл бурунгаар Тываның Медицина палатазының ажыдыышкынынга Россияның Медицина чөвүлелиниң президентизи Леонид Рошаль кээп чораан. Бо үе дургузунда регионнуң эмнелге ажылдакчыларының каттыжыышкыны дөрт чыышты эрттирген. Оларның артында кончуг-даа улуг ажыл туруп турар. Бистиң палатаның эң-не кол сорулгаларының бирээзи – эмнелге ажылдакчыларының доктаамал өөредилгези болгаш билиин бедидери, эмнелге ажыл-агыйын бот-башкарары болгаш эмнелге ажылдакчыларының эргелерин камгалаары болур дээрзин демдеглээр апаар” – деп, Лилия Айдарова чугаалаан.
Республиканың медицина ниитилелинде шак мындыг улуг хемчээлдиг шуулган бир дугаар болуп турар. Ажылдап келген үезиниң дургузунда Тываның кадык камгалал системазынче Медицина палатазы эвээш эвес чаартылгаларны, төлевилелдерни киирген. Ынчангаш амгы үеде эмчилер пациентилерге оон-даа чоок апарган. Социал четкилер таварыштыр эмчилер боттарының ажыл-агыйының дугайында чугаалап, чаа-чаа медээлерни салып, чурттакчы чоннуң айтырыгларынга харыылап берип турар.
“Шак мындыг каттыжыышкынга ажылдаары кончуг чугула деп санап тур мен. Ажылчын хевирге эмнелге ажылдакчыларының хөй-ле чугула айтырыгларын сайгарып чугаалаштывыс. Ол дээрге медицина этиказы, эмчилерге грантылар деткимчези болгаш эмнелге ажылында эрге-хоойлу талазы-биле айтырыглар болур. Медицина палатазы моон-даа соңгаар эки ажылдаар дээрзинге идегеп тур мен” – деп, Тываның Медицина палатазының удуртулгазының даргазы Анджела Канчыыр-оол бодунуң сагыш-сеткили-биле үлешти.
Ол ышкаш шуулганга регионнуң камдык камгалал системазының хоочуннарынга Тываның Баштыңының хүндүлел бижиктерин тыпсыр ёзулал база болган. ТР-ниң Баштыңының Өөрүп четтириишкин бижиин 1 дугаар республика эмнелгезиниң кезиишкин кылыр блогунуң санитарказы Ульяна Сатка, Туберкулёзка удур диспансерниң туберкулёзтуң хөй-ле эмнерге чаңчыга берген хевирин эмнээр салбырның эргелекчизи Сайлык Сүгежикке, Наркология диспансериниң кастеляншазы Софья Борбак-оолга тывыскан.
ТР-ниң Баштыңының Хүндүлел бижии-биле Перинаталдыг төптүң консультация-диагностика салбырының акушери Любовь Монгушту, сааттыг иелер аарыглары эмнээр салбырның эргелекчизи Алина Мылдыкты, 1 дугаар республика эмнелгезиниң эмчи сестралары Людмила Салчакты, Марианна Донгакты, фтизиотерапевт эмчи Клавдия Ойдупту база оон-даа өскелерни шаңнаан.
Хөй чылдарда ак сеткилдиг ажылы болгаш хөй ниити ажылынга киирген улуг үлүг-хуузу дээш ТР-ниң Дээди Хуралының (парламент) хүндүлел бижии-биле Медицина палатазының идепкейжилери Сайзана Соянны, Айдыс Кууларны, Сай-Суу Ойдуп-оолду, Азелстан Сүрүн-оолду, Анджела Канчыыр-оолду шаңнаан.
Сергей Серекей аттыг “Хөй-ниитиниң үнелээшкини” деп медальды 12 эмнелге ажылдакчызы алыр аас-кежиктиг болганнар. Оларга Галина Маады, Надежда Сат, Долбаа Бегзи, Зинаида Монгуш, Раиса Киселева болгаш оон-даа өскелер хамааржыр.
Бодунуң ээлчээнде Тываның кадык камгалал сайыды Анатолий Югай шуулганның киржикчилеринге байырын чедирген. Ол аныяк болгаш арга-дуржулгалыг эмчилерге материалдыг кежиктер чедип алыр болгаш эмнээр-домнаар уран чүүлдүң аразынга таарымчалыг орукту тып алырын, эмчи кижиниң мергежилинде кээргел сеткил бирги черде дээрзин утпазын күзээн.
Чыжыргана СААЯ
"Шын" №46 2023 чылдың июнь 24
