Долу эвес мобилизация үезинде хажыдыышкыннар туруп келзе, каяа баарыл?
Бо айтырыгга Тываның прокурорунуң хүлээлгезин күүседип турар Владимир Александрович Большуновтуң харыызы:
- Бир дугаарында, мобилизацияже келдиртиишкин алган улус шериг комиссариадынга баргаш, бүгү документилерин көргүзер ужурлуг. Оон шериг прокуратуразынга, девискээр прокуратуразынга, суд черинге, Улусчу фронтуга база дыңнадып болур. Бо бүгү албан черлери аразында кады ажылдажылганы канчаар чорударын биле берген. Шуптузу “изиг шугумда” коштунган, кандыг-даа айтырыг кээрге, дүрген болгаш билдингир харыыларны дораан берип турар.
Бир эвес мобилизацияже келдирткен кижини ажылындан үндүрүптер таварылга турар болза, ону ооң төрелдери, эжи азы боду шериг комиссариадынга дыңнадыр. Аңаа айтырыг шиитпиреттинмейн баар болза, биске, прокуратурага кээр. Бис шак ындыг хажыдыышкын кылган ажыл берикчизинге хамаарыштыр харыысалга онаар шиитпирни үндүрер апаар бис. Кол-ла чүве - дүрген дыңнадырындан хамааржыр.
