Келдиргеннерге сүме

Бронь алган улусту мобилизацияже келдире берген болза, чүнү канчаарыл?

Бо айтырыгга Тываның Шериг комиссарының оралакчызы Андрей Валерьевич Басенков мынчаар харыылаан:

- Бронирование (чагыг ёзугаар хостадыры) – мону ажыл берикчилери, албан-организацияларның удуртукчулары баш бурунгаар бүдүрүлгеде, азы кандыг-ла-бир ажыл черинде ажылдакчыны мобилизациядан хостаар ужурга таваржы берген болза, дораан шериг комиссариадынга келгеш, келдиртилгеден хостадыр ажылдакчыларының даңзызын киирер. Бир эвес ажылдакчыда бронь бар болза, ол кижиге шериг комиссариадынче келдириишкин келбес. Ажыл берикчизи ажылдакчызынга мобилизациядан хостаан дугайында шынзылганы тыпсып бээрге, шериг комиссариадында ол документиниң чартыы - бижимел дыңнадыы артып каар.

Долу эвес мобилизацияны чарлапканда, РФ-тиң Чазаанга бронь талазы-биле ажылдаар яамы-ведомстволар аразының чаңгыс аай комиссиязын тургускан. Ол комиссия ажыл-агыйның адыр аайы-биле күрүнениң эрге-чагыргаларындан эгелээш, албан-организацияларга чедир кандыг мергежилдиг улуска броньну бээриниң дугайында шиитпирлээр ажылды чоруткан. Ам-даа чорудуп турар. Бистиң республикавыста база ындыг комиссия ажылдап турар.

Маңаа демдеглексээн чүүлүм, сентябрь 21-де долу эвес мобилизацияны чарлаптарга, бистиң республикага хамаарыштыр чугаалаар болза, дөрт шак болганда шеригже келдиртилге комиссиязы дарый дүрген чыылгаш, хуралдаан. Даартазында, дораан штабты тургускан. Оон база бир хонганда, мобилизация-биле чаңгыс кижи безин чорутпаанда, кандыг дуза херегил дээн улус кээп, долгап, сагыш човап эгелээн. Бодумнуң шериг албан-хүлээлгелиг ажылдаанымдан бээр бо 8 дугаар черде шериг хүлээлгем эрттирип турарым бо. Республиканың чазак-чагыргазы-биле чонунуң аразында удур-дедир дуза кадарынга көрдүнген ажылдың кончуг дүрген болгаш билиишкинниг эки чоруп турарын шуут магадап кайгадым. Шак мындыг таварылганы черле көрүп көрбээн мен – деп, Андрей Басенков чугаалаан.