Кадык камгалал сайыды Анатолий Югай эрткен дыштаныр хүннерде Чөөн-Хемчик кожууннуң Теве-Хая, Хорум-Даг, Бажың-Алаак, Хайыракан суурларда фельдшер-акушер пунктуларының чаа оран-савазын хынап четкен.
Ооң кол сорулгазы 2025 чылдың “Кадык камгалалы” национал төлевилелдиң бирги звенозун чаартыр база 2025–2030 чылдарда боттаныр чаа национал төлевилелдерже киреринге беленин хынаары болган. Сайыт тус черниң чагыргазының төлээлери-биле кады чаа тудуг турар девискээрлерни көрген. Ийме суурда кадык камгалалының бирги звенозун чаартыр программа-биле доостур четкен фельдшер-акушер пунктузунга база четкен.
2021 чылдан тура Чөөн-Хемчик кожууннуң девискээринге “Кадык камгалалы” национал төлевилелдиң бирги звенозун чаартыр программа-биле Хөндергей, Чыргакы суурларга фельдшер-акушер пунктулары болгаш Чыраа-Бажынга эмчи амбулаториязы туттунган.
2025 чылда бүдүн республикада төлевилелдиң программазынче 12 тудуг объектизи болгаш 5 оран-савага капитал септелге кирип турар. Төлевилелди камгалаарын чоокку үеже планнаан.
Бистиң корр.
“Шын” №73 2024 чылдың сентябрь 25
