Республика девискээринде часкы үерлээшкин үези эгелээнинден, хемнер, сугларда байдалдарны хүннүң-не хыналдага алган. Май 21-ниң медээзинден алырга, регионнуң хемнеринде сугнуң хемчээли көдүрүлген. Ылаңгыя Улуг-Хемниң суу улгаткан.
Тываның Баштыңы Владислав Ховалыг онза байдалдарны болдурбас болгаш чайладыры-биле күштерни база дериг-херекселдерни белен тударын дааскан.
– Саян эдектеринде чаъстап эгелээнинден суг чоорту көдүрлүрү чайлаш чок. Ынчангаш үерлээшкинни контрольдаар гидропостулар хемнерде байдалды хүннүң-не хынаар. Республиканың бүгү күштери кезээде белен байдалче шил- чиир – деп, Владислав Ховалыг дыңнаткан.
Оперативтиг медээлерден алырга, май 22-ниң хүнүнде Улуг-Хемниң суу 24 см-ге көдүрлүп келген. Май 21-ден 22-же Хемчик хемниң суу 11 см-ге улгаткан, чамдык участоктарда суг эриин ашкан. А арткан хемнер, сугларда сугнуң хемчээли ажырбас. Гидропостулар 11 суг объектилерин хыналдада алган.
Каа-Хем кожууннуң Сарыг-Сеп суур девискээринге часкы үер үезинде онза байдалдарны чайладырынга командалыг-штаб өөредилгелери Россияның ОБЯ-зының Тыва Республикада кол эргелели удуртуп эрткен. Аңаа Тыва Республиканың хамааты камгалал болгаш онза байдалдар албанының камгалал күштери болгаш дериг-херекселдери база киришкен.
Каа-Хем кожуун девискээринге эрткен өөредилге үезинде, суг үерлээшкинин болдурбазының база ооң уржуктарын чайладырынга, ол ышкаш өрт айыыл чок чоруун хандырарынга күштерниң хөделир чурумун быжыглап, катаптап, чурттакчы чонга түр үениң чурттаар черин тургускан.
Өөредилге үезинде билдинген четпестерни чайладыр хемчеглерни хүлээп алырынга арга-сүмелерни ажылдап кылган.
ТР-ниң Чазааның парлалга албанының медээзинден.
«Шын» №38 2024 чылдың май 25
![](https://shyn.ru/media/cache/2024/05/27/908ocw280vk-b1bb6143b4.jpg)