| БАРЫЫН-ХЕМЧИК КОЖУУННУҢ 100 ЧЫЛДААНЫНГА |
Төрээн кожуунувустуң 100 харлаан оюнга бистиң ынак кырган-ачавыс, Шекпээр сумузунуң хүндүлүг чурттакчызы чораан – Эртине-Очур Маскырович Ооржактың дугайында бижикседим.
Ол 1928 чылдың март 16-да Барыын-Хемчик кожууннуң Ак сумузунуң Аржаанныг-Арыгга бөдүүн өг-бүлеге төрүттүнген. Бир акылыг, бир кыс дуңмалыг – Кашпык-оол, Ичин-Норбу.
Эртине-Очур Ооржак Шекпээр суурну тургузуп турар үеде суурга комсомол секретарьлап турган. Суурнуң аныяктарын удуртуп алгаш Аяңгатыдан бажыңнар тудар токпактарны сөөртүп эккеп, суурнуң баштайгы клувунуң тудуун дорт харыылап, самаан биле клубту тутканнар. Клубтуң баштайгы удуртукчузу болуп ажылдаан. Ол уран-талантылыг, игилге дыка онза ойнап чораан. Игилди, бызаанчыны боду чазап кылып турган.
Игилге хеймер оглун база өөредип каан. Уран-талантызындан аңгыда ус-шевери-биле чонну кайгаткан: өг ишти, аптара, этажеркалар, стол, сандайлар дээш чүнү чазавайн чораан дээр, чок болган улустуң кавайын безин чазап чораан.
Э.-О. М. Ооржак өөнүң ишти Хеймерек Кара-Хунаевнаның өг-бүлези үлегерлиг, ажы-төлүн ажылгыр кижилер кылдыр кижизиткен.
Улуг оглу Алексей хөй чылдар иштинде кыш, чай чок "Шекпээр" совхозтуң малчыннарынче суг сөөртүр машинага чолаачылап ажылдап чораан.
Уруу Анна Ак-Довурак хоорайга даараныр фабрикага даараныкчылап чораан, сөөлгү чылдарда хоорайның почтачызы болуп ажылдааш, хүндүлүг дыштанылгаже үнген.
Хеймер оглу Мергелдей хөй чылдарда бажың тудар комбинатка, амгы үеде южный микрорайонда чаа ажыттынган «Тубтен Шедруб Линг» хүрээде ажылдап, чонунга бараан болуп чоруур.
Эртине-Очурнуң үре-салгалдары төлептиг кижилер болуп амыдырап-чурттап чорууру өөрүнчүг, дээди эртемниг башкы, банкир, чолаачы, токарь, Россияның армиязының офицери. Уран-талантылыг, ус-шеверин дөзээннер уйнуктарындан үнүп турар.
Кырган-ачавысты Барыын-Хемчик кожууннуң болгаш Шекпээр сумузунуң бир төлептиг хамаатызы, идепкейжи, ажылгыр, кежээ чурттакчызы чораан деп санап, сактып, хүндүлеп чоруур бис.
Алдынай ООРЖАК.
Чуруктарны авторнуң архивинден алган.
“Шын” №36 2025 чылдың сентябрь 18
