Ростислав Докур-оолович Кенденбиль — тыва композиторларның баштайгы “хараачыгайларының” төлээзи, бедик мергежилдиг үндезилекчи композиторларның бирээзи. Ол 1922 чылдың май 30-де Чөөн-Хемчик кожууннуң Хөндергейге төрүттүнген. Хүреш-оол Кара-Салович Дамба – шылгараңгай композитор, Тываның Ленинчи комсомол шаңналының эдилекчизи. Ол 1943 чылдың июль 20-де Бай-Тайга кожууннуң Шуйга төрүттүнген.
Үстүнде адаанывыс улуг композиторларывыс тыва уран чүүлге балаттынмас исти арттырып, ачы-хавыяалыг үнелеп четпес ажылды кылып, биске өнчү кылдыр арттырган дээрзин 2023 чылдың июнь 6-да Тываның Национал хөгжүм-шии театрынга болган улуг концерт бадыткап турар. Р.Д. Кенденбильдиң 100 база Д.К.-С. Хүреш-оолдуң 80 харлаанын демдеглээн байырлыг концерттиң эрттирикчилери — Красноярскының академиктиг симфониктиг оркестри база Тываның В.М. Халилов аттыг күрүне филармониязы.
Зал шыгырт долу. Хостуг олуттар чок кылдыр көрүкчүлер баш бурунгаар олуттарын ээлепкен. Красноярск хоорайдан келген оркестрниң дирижёру Михаил Мосенковтуң ээлгир холунуң адаа-биле аялга куттулуп, бирги көргүзүгден-не концерттиң бедик шынарлыы илереп келген. Ооң соонда ТР-ниң культура сайыды В.С. Чигжит байыр чедирип, сөс алган.
Концерттиң программазында Р. Д. Кенденбильдиң чогааткан аялгазынга “Сөс чок аялгалар”, “Чечен биле Белекмаа”деп операдан романс, “Айлаң-кужум”, “Кады чор сен, авай”, “Чавыдак”, Хүреш-оол Дамбаның “Мээң Тывам” деп симфониктиг шүлүглели дээш оон-даа өске ырларны оркестрниң үделгези-биле ТР-ниң алдарлыг артизи Эльвира Докулак, филармонияның ыраажылары Сайлык Саая, Тэгшээ Цэцэндэлгэр, Шыңгыраа Ондар күүсеткеннер. Көрүкчүлерни база бир магадаткан чүүл – Красноярскының симфониктиг оркестриниң ыраажызы Пётр Худоноговтуң лимбиге (флейтага) аялгалары. Оон-даа өске ырларны көрүкчүлер диңмиттиг адыш часкаашкыннары-биле үдеп, өөрүп четтиргенин илередип турганнар.
Красноярск биле Тываның культура яамызының катай чорудуп турары “Эне-Сайның симфониязы” деп хөгжүм чогаалының салгалы” төлевилелдиң ажылдары концерттери моон-даа соңгаар уламчылаар сорулгалыг.
Бистиң корр