Ноябрь 19-та Кызылдың «Сүбедей» спорт школазынга «Тергиин шыдыраачы–2024» мөөрейниң түңнел шилилге оюннары доозулган. Аңаа Тываның эң шыырак 32 шыдыраачызындан шилиттинген 8 ойнакчы долгандырыг системазы-биле мөөрейниң төнчү оюнунга ойнаар ийи тиилекчини илередир дээш, 4 хонук дургузунда ачыр-дачыр демисешкеннер.
Бо чылдың «Тергиин шыдыраачы» мөөрейиниң онзагай чүүлү — 8 кижи киржикчилиг түңнел шилилге маргылдаага 4 школачы (Арина Иргит, Монгун Сарыг-Лама, Начын Чамзы, Болат Бадыраа) болгаш 1 студент (Кежик Монгуш) киришкени. Арткан 3 шыдыраачының эң улуу республиканың шыдыраага 5 дакпыр чемпиону Артыш Чүлдүм (44 харлыг) болган. Шыдыраага тренер башкылар Адыгжы Куулар биле Долаан Салчак база-ла дөртен хар үезинде болгаш, үстүнде чаш-чалыы шыдыраачылар оларның өөреникчилери ышкаш болган.
Эрткен маргылдааның эң сөөлгү, чеди дугаар салыында ап болгу дег алды сандан 4,5–4,5 саннарны алган турган Долаан Салчак биле Кежик Монгуш таварышканнар. Оларга бичии уруглар аразынга Россия Кубогунуң ийи дакпыр тиилекчизи, чоокта чаа Бразилияга болган делегей чемпионадынга 65 киржикчи аразындан 18 дугаар черге төлептиг болган Кызылдың 15 дугаар лицейиниң өөреникчизи Арина Иргит чедип болур турган. Ынчалза-даа Арина сөөлгү салыгда Начын Чамзы-биле хайымнап кааш, 4,5 санныг апаарга, кол кордакчылар база аразында хайымны чарлааш, 5–5 санныг болуп дооскаш, «Тергиин шыдыраачы–2024» финалынга ойнаар эргени чаалап алганнар.
Маргылдааның саавырын ёзугаар 1–2-ги черни алган тиилекчилерни илередир дээш, дең санныг дооскан Долаан Салчак биле Кежик Монгуш 3 катап блиц хевиринге ойнаарга, аңаа 3–0 санга Кежик тиилээн.
«Тергиин шыдыраачы–2024» мөөрейниң түңнел шилилге маргылдаазының тиилекчизи 18 харлыг Кежик Монгуш Новосибирскиниң күрүне университединиң студентизи. Ол шыдырааның рапид хевиринге Новосибирск облазының вице-чемпиону болуп турар.
Эрткен маргылдаага 2 дугаар чер алган Долаан Салчак Тываның ам бо хүнде чемпиону болбушаан, ниитизи-биле республиканың 3 дакпыр чемпиону. Долаан Салчак Россияның күш-культура университединиң шыдыраа салбырын дооскан, ол талазы-биле дээди эртемниг Тывада чаңгыс специалист болур.
Олар декабрь айда болур 150 муң акша шаңналдыг «Тергиин шыдыраачы–2024» мөөрейниң түңнел оюнунга киржирлер. Ооң тиилекчизи 100 муң, уттурганы — 50 муң акша шаңналын чаалап алыр.
Эрткен чылын болган «Тергиин шыдыраачы–2023» мөөрейге Болат Бадыраа тиилээн, Экер-оол Манчын 2 дугаар чер алгаш, база ол хире шаңналдыг болганнар.
Болат бо удаада финалче кирип шыдавайн барган, а Экер-оол Манчын тускай шериг операциязынга киржип тургаш, шилилге маргылдааларга киржип шыдаваан.
Кончуг солун, чидиг демиселге болуп эрткен «Тергиин шыдыраачы–2024» мөөрейниң түңнел шилилге маргылдаазы көрүкчүлер, аарыкчылар киирбес хааглыг байдалга болуп эрткени хомуданчыг болган.
Мерген Кыргыс.
Дайынчы Ондарның тырттырган чуруу.
“Шын” №89 2024 чылдың ноябрь 20
