Бир-ле катап Бурган инекти бодараткаш: «Сен оът-сиген чип, бызаалар төрүп, ээлериңни сүт-биле азыраар сен. Ынчангаш сеңээ 60 харга чедир чурттаар чуртталганы берип тур мен» — дээрге, инек харыылаан: «Чурттап эртер назынымда кылыр ажылдарым аар-дыр. Мен чүгле 20 чыл чурттаайн. 40 чылын эгидип тур мен» — дээрге, Бурган чөпшээрежип-тир.
Бурган дараазында хүн сарбашкынны бодараткаш: «Кижилерниң кылдыныгларын өттүнүп, оларны каттыртып, өөртүп-хөлзедип чор. Ол дээш сеңээ 20 чылды берейн» — деп-тир. Сарбашкын тургаш: «Кандыг кончуг чалгааранчыг чүвел, чээрби чыл ынчап кээри меңээ берге-дир. Мен чүгле 10 чыл чурттаайн, он чылын катап эгидип тур мен» — деп дилээр орта, Бурган чөпшээрээн-дир.
Дараазында хүн ытты бодараткан чүве иргин. Бурган: «Сээң кылыр хүлээлгең болза, аал-коданыңны шынчы кадарып, танывас улусту өгже киирбези болур. Ол дээш 20 чылды хайырлап тур мен» — дээрге, ыт тургаш: «Сарбашкын чурттаар ужурлуг турган он чылын эгидип берипти ышкажыл. Мен база он чылымны эгидип бериксеп тур мен. Кодан сагыырынга ынча хөй чыл чалгааранчыг-дыр» — дээш чурттаар ужурлуг 10 харын эгидип берипкен.
Дөрткү хүнде Бурган кижини бодараткаш: «Сен ижип, чип, дыштанып, ойнап-хөглээр сен. Ол дээш 20 чылдың назынын берейн» дээрге, кижи тургаш: «Чээрби борбак бе? Ижип-чип, ойнап-хөглээринге 20 чыл чедишпес. Силер меңээ инектиң албааны 40 чылды, сарбашкын биле ыттың эгиткени 10—10 чылдарын немеп бериңерем. Ынчаар орта, 80 хар чеде бээр- дир» — деп дилээн. Бурган кижиниң дилээн хандырып, 80 хар чурттаар назынны хайырлап-тыр.
Ынчангаш кижи чурттап эртер назынында Бурганның бергени-биле баштайгы 20 назынында ижип-чип, ойнап-хөглеп чурттаар. Дараазында 40 чыл иштинде өг-бүлезин азыраар, хүнзедир ажылдаар. Ооң соонда арткан он чыл ажы-төлүнүң ажы-төлүн карактажып, оларны хөгледип, каттыртып ойнаар дээш сарбашкынны өттүнер, сөөлгү 10 чылында ыт дег чааскаан аал-оранын кадарып артар салым-хуулуг болган дээр.
Чурукту интернет четкизинден алган.
"Шын" №36 2023 чылдың май 20