Тываның Национал парыгынга Уруглар камгалалының хүнүнде тускай шериг операциязының хоочуннарының болгаш киржикчилериниң уругларынга янзы-бүрү солун мөөрейлерни шериг операциязының киржикчилерин деткиир «Ада-чурт камгалакчылары» деп Күрүне фондузунуң ТР-де салбыры Ада-чурт дайынчыларының өг-бүлелериниң комитеди-биле кады организастап эрттирген.
«Мээң ачам – маадыр» деп темалыг делгелгеге ТШО-га маадырлыы-биле амы-тынындан чарылган болгаш амгы үеде ында эрес-дидими-биле киржип турар ачаларын уруглар чураан. Ол ышкаш олар асфальтыга өг-бүлезиниң кежигүннерин өңнүг чугайлар-биле чараш чүзүн-баазын өңгүр кылдыр чураан. Бүгү-ле мөөрейлерге тиилээн уругларга шаңналдарны болгаш белектерни фонд ажылдакчылары тыпсып, уругларның сагыш-сеткилин өөрткен.
Калашников автомадын үүрмек кезектерге чазарынга болгаш чыырынга мөөрейни ээледи оолдар аажок сонуургап, идекпейлиг киришкен. Ону ТШО-нуң хоочуну ук фондунуң даргазының хөй-ниити төлевилелдер болгаш партиотчу кижизидилге талазы-биле оралакчызы Азиат Догдугаш организастап эрттирген. Мөөрейге киришкен оолдар аразындан эң-не эвээш, 6 секунда дургузунда автоматты чазып турар оолдар бар дээрзин ол демдеглээн. Ол ышкаш Макаровтуң пистолеттерин болгаш шериг рацияларын уруглар холунга тудуп, сонуургап көөр аргалыг болган.
Шак мындыг хемчеглер ТШО-нуң хоочуннарынга болгаш оларның өг-бүлелерин хөй-ниити аразынга деткиири база оларга кичээнгейлиг хамаарылганы илередири болур дээрзин «Ада-чурт камгалакчылары» деп фондунуң даргазы Анна Цивилева демдеглээн.
– Фондунуң кол сорулгазы, бир дугаарында, ТШО-нуң хоочуннарынга болгаш маадырлыы-биле мөчээн дайынчы оолдарның өг-бүлелеринге ачы-дуза чедирип, оларның амыдыралы дээш сагыш-човап, бүгү талазы-биле деткимче чедирери болур. Ада-чуртувус Россияны камгалап чораан база камгалап чоруур маадырлар дээш кижи бүрүзү чоргаарланып чоруур ужурлуг бис. Ол талазы-биле бис, Россияның чурттакчылары, демниг бис. Шак мындыг хемчеглер дайынчыларга болгаш оларның өг-бүлелеринге боттуг деткимче болуру чугаажок – деп, Анна Цивилева чугаалаан.
Тускай шериг операциязының хоочуннарының болгаш киржикчилериниң өг-бүлелерин деткиириниң чугулазын Ада-чурт дайынчыларының комитединиң удуртукчузу Юлия Белехова дыңнадып турар.
– Тускай шериг операциязының киржикчилерин болгаш оларның өг-бүлелерин боттуг дузаны доктаамал чедирери чугула. Хүн бүрүде амыдыралда кандыг бергедээшкиннерге олар таваржып турарыл, дуза кадыптар, чылыг-чымчак сөстер чугаалап, бүгү-ле дузаны чедирер херек – деп, Юлия Белехова чугаалап турар.
«Фондунуң эрттирип турары хемчеглери хоочуннарның болгаш шериг операциязынга эрес-дидими-биле бажын салган маадырлыг дайынчыларның өг-бүлелери-биле чугаалажып, оларны дүвүредип турар айтырыгларны шиитпирлеп, дуза кадарынга таарымчалыг байдалдарны тургузуп турар. Ылаңгыя оларның уругларынга онзагай, чараш хемчеглерни даады эрттирери чугула. Чаштар байырлалында олар улуг кижилерниң кичээнгейинге өпейледир ужурлуг» – деп, фондунуң Тывада салбырының даргазы Мерген Кызыл-оол демдеглээн.
Россияның Президентизи Владимир Путин 2023 чылдың апрель 3-түң хүнүнде «Ада-чурт камгалакчылары» деп Күрүне фондузун тургузар дугайында айтыышкынга адын салганын сагындыраал.
Фондунуң кол сорулгазы ТШО-нуң хоочуннарынга социал адыр талазынга янзы-бүрү күрүне деткимчелерин алырынга дузаны чедирери болур.
/ Алиса ДОНГАК.
"Шын" №40 2023 чылдың июнь 3
