Регионнар аразының «Сибирь дугуржулгазы» ассоциацияның транспорт талазы-биле башкарыкчы чөвүлелди Владислав Ховалыг баштаар дугайында Владивостокта Чөөн чүктүң экономиктиг форумунуң шөлүнге болуп эрткен “Сибирь дугуржулгазы” регионнар аразының ассоциация хуралының соонда билдинген. Тываның болгаш Сибирь регионнарының губернаторлары база төлээлери Приморье крайда чыглып келген. Регионнар аразының “Сибирь дугуржулгазы” ассоциациязының күүсекчи комитединиң даргазы Геннадий Гусельников мынча деп демдеглээн: “Чөөн чүк экономиктиг форумунуң шөлүнге кады ажылдажылганы идепкейжидер сорулганы улуг Сибирьниң шупту регионнары боттарының киржилгези-биле деткээн”.
Тываның Баштыңы Владислав Ховалыгның чугаазы-биле алырга, форум үезинде СФО-нуң губернатор корпузунуң мурнунда салган айтырыгларның бирээзи – Ыраккы Чөөн чүкте коллегаларындан арга-дуржулганы шиңгээдип алыры. Сибирьниң социал-экономиктиг хөгжүлде стратегиязынче кирген хемчеглерни боттандырарынга ол ажыктыг.
«Ук документиниң 2035 чылга чедир боттаныышкыны, СФО-ну экономиктиг шапкын хөгжүлдеге эккээр ужурлуг. Ынчангаш субъект бүрүзүнүң күштүг талаларын ажыглаары көрдүнген. Сибирьниң губернаторлары, бис, ону ам үлегерлеп шиңгээдип алыр ужурлуг бис” – деп, Владислав Ховалыг социал четкилерде бижээн.
Чурттар аразының кады ажылдажылгазын дүргедедири – Владивостокта бо чылын эртип турар экономиктиг форумнуң шупту хемчеглерниң өзек темазы. Тываны таварыштыр Россиядан Моолче болгаш Кыдатче транспорт коридорунуң техника-экономиктиг үндезинин белеткээрин документиде кииргенин чижекке ап болур. Республиканың Чазаа ол ажылдың чугулазын бадыткаан. Россияның вице-премьери Виктория Абрамченко, Федералдыг экономиктиг сайзырал яамызының удуртулгазы инициативаны деткээн.
Россияның Чазаа стратегияже киирген хемчеглерниң күүселдези Сибирь федералдыг округтуң регионнарынче хуу инвестицияларны хаара тударынче болгаш турум экономиктиг өзүлдени хандырарынче угланганын демдеглээн. А МАСС харылзаштырар рольду ойнаар. Ам Владислав Ховалыгның удуртуп эгелээни “Сибирь дугуржулгазы” регионнар аразының ассоциациязының чөвүлел хуралдарының бирээзинге документини боттандырарының айтырыгларын сайгарып чугаалажыр.
“Сибирь дугуржулгазы” регионнар аразының ассоциациязының транспорт талазы-биле харылзаштырылга чөвүлелинден деткимчени ап, удуртур болдум” – деп, ол бодунуң блогунда бижээн.
Тываның Баштыңы бодунуң дыңнадыында Владивостокта Федералдыг каайлы албанының удуртукчузунуң албан-хүлээлгезин күүседип турар Руслан Давыдов-биле чугааны чорутканын бижээн. Моол-биле кызыгаарда «Хандагайты – Боршоо» эрттирилге пунктузунуң эде чаартылгазын чугаалашкан. Сибирьни хөгжүдериниң стратегиязынче кирген, республика таварты эртер ол транспорт коридорун тударының Тывада кол ажылынга анализти кылган. Тываның Экономика яамызы Хандагайтыже чүък болгаш пассажирлер аргыжылгазы чылда 15–20 хуу көвүдээрин демдеглээн. Ол транспорт белдириниң эптиин болгаш ону таварты транзит оон-даа улам сайзыраарын бадыткап турар. Кажан эде чаартылга ажылдары доосту бээрге, дыштаныр хүн чокка, хондур-хүнзедир ажылдаар апаар. Ынчап кээрге, немей кадрлар курлавыры негеттинип турар.
«Руслан Валентинович ол айтырыг шиитпирлеттине бээрин аазады» – деп, Тываның Баштыңы ужуражылганың түңнелин дыңнаткан.
Чөөн чүктүң экономиктиг форуму үш хүн үргүлчүлээр. Федералдыг болгаш тус черниң массалыг информация чепсектери хемчеглер программазы делгем дээрзин демдеглээн. Владислав Ховалыг Владимир Путинниң сөс алыры пленарлыг сессияга киржир. Российжи информагентилелдер Президентиниң Владивостокта чедип келгенин дыңнаткан.
Тываның Чазааның парлалга албаны.
«Шын» №68 2023 чылдың сентябрь 13