Эрги өртемчейниң бут бөмбүүнге кол болуушкун — Европаның чемпионады июнь 14-те эгелээн. Ол бир ай дургузунда үргүлчүлээр. Аңаа 24 национал команда киржир.
2024 чылда Европаның бут бөмбүүнүң чемпионадынга Россияның чыынды командазын шилилге оюннарга болгаш россий клубтарны билдинмес хуусаада Бүгү-делегей маргылдааларынга киириштирбезиниң дугайында 2022 чылдың сентябрьда-ла билдингир апаргаш турган. Чемпионат июнь 14-тен эгелээш, июль 14-ке чедер. Сөөлгү оюнда Европаның чаа чемпионун илередир.
Европаның кол национал олчазы дээш демиселди Австрияның, Албанияның, Англияның, Бельгияның, Венгрияның, Германияның, Грузияның, Данияның, Испанияның, Италияның, Нидерландыларның, Польшаның, Португалияның, Румынияның, Сербияның, Словакияның, Словенияның, Турцияның, Украинаның, Францияның, Хорватияның, Чехияның, Швейцарияның болгаш Шотландияның чыында командалары эгелээн турган.
Команда бүрүзүн дөрт-дөрт кылдыр алды бөлүкке чарган. Бөлүк чадазының иштинге олар плей-оффче үнер эрге дээш дөрт команданың бүрүзү-биле ойнаар. Маргылдааның сестиң биринде бодунуң бөлүктеринге бирги болгаш ийиги черлерни алган база үшкү черни ээлээн дөрт эң дээре команда дараазында чадаже үнер. Плей-офф чадазында олимпийжи система ёзугаар ойнаар – уттурган команда маргылдаадан үнер, а тиилээни дараазында чадаже үнер. Ам безин чамдык чидириглер, улустуң манавааны чүүлдер болуп турарын көрүп тур бис.
Opta компанияның тулган угаанныг компьютери Европаның бирги черин ойнап ап болур командаларга Германияның, Испанияның, Португалияның болгаш Францияның чыынды командаларын хамаарыштырган. А Россияның чыынды командазының эргиде халдакчызы Дмитрий Булыкин: “Мындыг чергелиг улуг турнирге чүү-даа болуп болур, мында аксында аазы катпааннар чок, ынчангаш киштен киш кара болур” – дээн болгай. Ооң сөстери бадыткаттынып турар. Португалия Грузияга таварышкаш, күскү бүрү ышкаш эстей берди. Ооң плей-оффче баш бурунгаар кире берген турганы чаяан болган. Оон башка...
“Сагыш ышкаш болган болза, Саглы ышкаш хову болза” деп олурувуста, шиитпирлиг оюннар хүннери чоокшулап келди. Кымның кым дээрзин удавас көрүптер бис.
А. ХЕРТЕК.
Чурукту интернеттен алган.
“Шын” №49 2024 чылдың июль 3
![](https://sun4-18.userapi.com/impg/O1_YGVB87J0cJo5G5Cs1ssw8eCu5QOLkZ4cQpQ/8-1rd8f8Dh8.jpg?quality=95&as=32x21,48x32,72x48,108x72,160x107,240x160,360x240,480x320,540x360,640x427,720x480,1080x720,1280x853,1350x900&sign=6f2ba17362488d9d6923624bc2679e42&from=bu&u=ci3ZT4vs5qShRos5_yuWnMauGqh4nDv2E8eyM5Kn5I8&cs=807x538)
![](https://sun9-74.userapi.com/impg/h5tXQT0iWAHl2ulfOT730MKWgEYvWI8VLvPY2w/g-66cnsslFA.jpg?quality=95&as=32x21,48x32,72x48,108x72,160x107,240x160,360x240,480x320,540x360,640x427,720x480,1080x720,1280x853,1440x960,2560x1707&sign=3be36500686641b5d34155e9eb2edcc8&from=bu&u=a08p0YGnCTgRPIrf48jcNoqqPmwnfezNjccnz2OpkuY&cs=807x538)
![](https://sun4-20.userapi.com/impg/VBwtWB3rtuX7nZQJrUptiuIhyO_qZfqV6BUADg/_6uNYTxvOXw.jpg?quality=95&as=32x18,48x27,72x41,108x61,160x90,240x135,360x203,480x270,540x304,640x360,720x405,1080x608,1280x720,1400x788&sign=0eb33a91fbc36dd93d1f49ca19355174&from=bu&u=vilnn2uunrLcmz0Q8WgvqZs2OqVCBcK0OzDp8RnuOF0&cs=807x454)