"ТЫВААВИА" компаниязы школачыларны келир үеде мергежилин шын шилип алырынга белеткээр азы «профориентация» ажылын эгелей берген. Компанияның ажылдакчылары ужуражылгаларны республиканың орук-транспорт яамызы база ооң эргезинде турар албан черлери-биле кады ада-чурттуң хамааты ужар чүүлүнүң (авиацияның) 100 чылдаан оюнга тураскаадып эрттирип турар. Ук хемчеглерниң кол сорулгазы - доозукчу класстарның өөреникчилеринге келир үеде бодунуң мергежилин шилип алырынга дузаны кадары болур.
Бир дугаар ужуражылгада "ТЫВААВИАНЫҢ" ажылдакчылары Тере-Хөл кожууннуң Кунгуртуг суурга доозукчу класстың өөреникчилеринге таныштырылга кичээлдерин эрттирген. Ыраккы Кунгуртугнуң келир үедеги сургуулдары вертолеттуң штурвалынга олуруп, ооң иштин бүрүнү-биле өөренип көөр аас-кежиктиг болганнар. Ужудукчулар оларга вертолетту ажылдадырының болгаш штурвалды башкарарының ужур-утказын чедимчелии-биле таныштырган.
«Бо ужуражылганы кажан-даа утпас бис. Кижи бүрүзүнге ужудукчунуң кабиназынга бодун ёзулуг ужудукчу кылдыр бодап, сагыштаалаар аас-кежик таварышпас болгай» - деп, өөреникчилер демдеглээннер.
Алиса ДОНГАК белеткээн.
Чуруктарны "ТЫВААВИА" медээзинден алган.
