Часкы тарылга үези келген. Аңаа хамаарыштыр ТР-ниң Баштыңы Владислав Ховалыг бодунуң блогунга дараазында демдеглелди кылган:
«Картофель тарыыр үе чоокшулаан. «Ийи дугаар хлебке» чоннуң, ылаңгыя хоорай черниң чурттакчыларының, хамаарылгазы шоолуг эвес апарганын эскердим. Дыка хөй улус картофельди тарып, довураан улгаттырып, суггарып, үе-шак болгаш күш үндүрүп тургаш канчаар, күзүн садып ап болур ышкажыл деп санап турар. Картофель шыгжаар чери чок дээш, хоорай чурттакчызын билип болур бис. А черде бажыңнарның чурттакчылары чүгле картофельди эвес, а свекла, морковь дээн ышкаш ногааны ыяап тарып алыр ужурлуг деп бодаар мен. Кижиниң бодунуң тарып, ажаап алган ногаазы черле эки-дир ийин. Ынчангаш чаңгыс чер чурттугларывыс ногаа-чимистен тарып, хериминиң иштинде черин болбаазырадып, ажыглалче киирзин дээш, чылдың-на «Улусчу картофель» деп национал төлевилелди тургускаш, үрезинни чылдың-на үлеп турар бис. Эрткен чылын ук төлевилелдиң деткимчези-биле барык 22,5 муң өг-бүлеге 7,5 сая рубльди чарып тургаш, үрезинни үлээн бис.
Чүгле дүжүттү ажаап шыгжаарында эвес-тир ийин. Өг-бүлеге кижизидилге ажылынга база ногаа тарылгазы улуг салдарлыг дээрзин бодумнуң дуржулгамдан чугаалап болур мен. Өг-бүлениң демниг болурунга, ажы-төлдү ажылга өөредиринге база тарылга болгаш дүжүт ажаалдазы кончуг ажыктыг ажыл».
А.Ондар белеткээн.
Чуруктарны интернет четкизинден алган.
