Гуманитарлыг дуза чыылдазы
Шагаага уткуштур кожууннарда тускай шериг операциязынче чорудар гуманитарлыг дуза чыылдазы кидин түлүк. Каа-Хем кожуунда бо хүннерде байдал мындыг: Суг-Бажы суурнуң чурттакчы чону 18900 рубль чыгган, Кундустуг – 18600, Ильинка – 31600, Дерзиг-Аксы – 22700, Чонну ажылга хаара тудар төп – 2500, Күш-ажыл болгаш социал хөгжүлде эргелели – 4000 рубльди тус-тузунда чыгган. Культура эргелели – бензин-биле ажылдаар генераторну эккелген.
Эрзин кожууннуң Херээженнер чөвүлелиниң «Иениң чүрээ» бөлүү база бир камгалал четкизин өрүп белеткээн.
Дуржулга солчулгазы
Таңды биле Улуг-Хем кожууннуң удуртулгазы Шагаан-Арыг хоорайга социал адырда кылып чоруур ажылдарының аайы-биле удур-дедир дуржулгазын солчуп, ужуражылганы эрттирген. Ийи тала чурттакчы чонга көргүзүп турар социал деткимче, «социал өскүстер» санын кызырары-биле баш бурунгаар чорудар хемчеглер, назылап кыраан кижилерге чедирер социал дуза, бажың-балгат-биле хандырылга, өг-бүлелер-биле ажылдаарының чаа-чаа аргаларын таныштырып ажылдаан. Ужуражылга А. Неверицкийниң «Он-Кум» мода болгаш костюм театрының кайгамчык оюн-көргүзүү-биле доозулган.
Тээлиге солун концерт
Бай-Тайганың Тээли суурда Н. Өлзей-оол аттыг культура бажыңынга РФ-тиң болгаш ТР-ниң улустуң артизи Люндуп Солун-оолдуң 85 харлаанынга болгаш тускай шериг операциязынга бажын салган маадырларның чырык адынга тураскааткан концерт болган. Сценага ийи аңгы салгал каттыжып кээп, бай-тайгажыларның сеткил-хөөнүн көдүрген. Концертке Тыва АССР-ниң алдарлыг артизи, ТР-ниң культуразының алдарлыг ажылдакчызы, Бай-Тайга кожууннуң улустуң артизи Люндуп Иргитовичиниң өөнүң ишти Зоя Солун-оол болгаш Тываның улустуң артизи Виктор Наксыл, Тываның алдарлыг артизи Эльвира Докулак, Тываның В. Көк-оол аттыг национал хөгжүм-шии театрының артистери, Алексей Чыргал-оол аттыг Кызылдың уран чүүл колледжизиниң салым-чаяанныг сургуулдары киришкен.
«Бадманы» шаңнаан
Ак-Довурак хоорайда Кадр-оол Сагды аттыг культура ордузунда «Бадма» мода болгаш костюм театрының үлегерлиг коллективи 2025 чылдың түңнелдери-биле делегей чергелиг хемчеглерге Тываны эки төлээлээни дээш, ТР-ниң Культура яамызының шаңналынга төлептиг болган.
Араттар ажылын түңнээн
Мөңгүн-Тайга кожуун чагыргазының хуралдаар залынга арат-фермер ажыл-агыйларының баштыңнары 2025 чылдың түңнелдерин үндүрүп хуралдаан. Кожуун чагыргазының чер болгаш өнчү-хөреңги талазы-биле кол специализи А.М. Кара-Сал болгаш үндүрүг инспектору А.В. Дагбы чалаткан аалчылар бооп хуралга киришкен. Отчеттуг чылда ажыл-агыйларның ажылын анализтеп, түңнеп, чаа чылче сорулгаларны салган. Эрткен чылда бедик көргүзүглерни чедип алган мурнакчы араттарны шаңнап-мактаан.
/ Арынны кожууннар чагыргаларының социал четкилерде албан арыннарындан Надежда КУУЛАР белеткээн.
“Шын” №4 2026 чылдың февраль 5