Баштайгы «илбичилер»
Тожу кожуунда «Азас сумузунуң күзелдер шивизи» деп ачы-буян акциязы байырлыг байдалга эгелээн.
Чаа чылдың хуулгаазын акциязын Азас сумузунуң «Тожама» волонтёржу бөлүү организастап турар. Хемчегниң кол сорулгазы – тускай шериг операциязының киржикчилериниң ажы-төлүнге Чаа чылдың кайгамчык илби-шидизин көргүзери.
Эң-не баштайгы «илбичилер» Тожу кожууннуң Төлээлекчилер хуралының даргазы Виктор Шырап баштаан депутаттар болган.
Чылбыга-кадайлар мөөрейлешкен
Тоолдар – чоннуң чүс-чүс чылдарда чогаадып тургускан байлак эртинези. Чылбыга-кадай тоолдарның кол маадырларының бирээзи. Чаа чыл бүдүүзүнде Ак-Довурак хоорайның Кадр-оол Сагды аттыг уран чүүл ордузунга "Чылбыга-кадайлар мөөрейи" деп хемчег болуп эрткен. Мөөрейге 5 кижиден тургустунган Чылбыга-кадайлар командалары оюн-баштак таныштырылгага, самнаарынга мөөрейлешкен.
Хемчегни Чылбыга кылдыр кеттинген ийи башкарыкчы театржыткан көргүзүү-биле ажыткан. Шииткекчилерни таныштырган соонда, мөөрей эгелээн. Сцена кырынче янзы-бүрү идик-хептиг, хөглүг чылбыгалар бөлүктери үнерге-ле, көрүкчүлер алгыржып, каттыржып диңмиттиг адыш часкаашкыннары-биле уткуп, үдеп турганнар.
Оюн-баштак, солун мөөрейниң түңнелинде 1-ги черни «Теремок» уруглар садының хоочуннары чаалап алган. 2-ги черге бичии уругларның немелде өөредилге чери төлептиг болган. 3-кү черге "Золотой ключик" уруглар сады тергиидээн. Тиилекчилерге кол шаңнал «Ларь» деп соодукчуну байырлыг байдалга тывыскан. Арткан киржикчилер база хол куруг чанмаан.
Чурум үрекчилери чок
Мөңгүн-Тайга кожууннуң Мугур-Аксында «Чечек» уруглар садының эр ажылдакчылары кежээки үеде күзелдии-биле чурум тудуп, дежурныйлааннар. Бүгү кожууннуң сумуларында албан черлерин, спортчу шөлчүгештерни, спортчу залдарны дээш хөй чон чыглыр черлерни кезип, хыналданы чоруткан. Кежээ орайтай бергенде, кудумчуга чаңгыс-даа назы четпээннер көзүлбээн. Олар оон ыңай котельнаяларның одакчыларын болгаш таңныылдарның ажылын база хынап көрген. Чурум үрекчилери илереттинмээн.
Күрүне деткимчезин алган
Бай-Тайга кожууннуң Тээли сумузунуң чурттакчызы Аян Маадыр социал керээ күрүне деткимчези-биле «Буянныг» деп машина септээр черни ажыткан. Күрүнеден алган 350 муң рубль-биле машина септээр бүгү дериг-херекселди четчелеп алган.
Куулар Дарья аттыг кудумчуда ажыттынган «Буянныгның» чонга ажыы улуг. Автомашиназы үрели берген чолаачылар ырадыр чер чорбайн, кожуундан үнмейн, септедип кылдырып ап болур апарган.
Хуулгаазыннар эгелээн
Бии-Хем кожууннуң чурттакчылары Бады-Белек Байыр-оол биле Ай-Хаана Кара-Салдың буянныг өг-бүлези Бии-Хем кожууннуң өг-бүлелерге болгаш уругларга социал дуза төвүнде бичии чаштарга чигирзиг белектерни сөңнеп чедирген. Чаа чылдың хуулгаазыннарының эгезин салганы ол.
/ А. Ондар белеткээн.
Чуруктарны интернеттен алган.
“Шын” №50 2025 чылдың декабрь 25