Чылдың кайы-даа үезинде малчыннарга айыыл тургузар дөрт буттуг амытан – бөрү. Ылаңгыя кышкы үеде аштаан бөрүлер малчын коданнарже халдап эгелээр.
Бо хүннерде республикада кокай аглаар 129 бригада ажылдап турар. Ында дуржулгалыг 747 аңчы хаара туттунган. Ук бригадалар 112 автомашина, харга халдыр 20 техника, 109 аът-биле чүмнеттинген.
2023 чылда кокай аглаар бригадаларга республика бюджединден 846 муң рубльди аңгылаан. Ук акшаны хөй кезиинде кывар-чаар чүүлге үндүрүп турар. Кокай аглаар аңчыларга бир кокай аглааны дээш 2 муңдан 5 муңга чедир рубльди шаңналга бээр. 2023 чылдың ноябрь 7-ден 2024 чылдың январь 12-ге чедир 152 бөрүнү аглаан. Оларның 91-и кыс, а 61-и эр бөрүлер болган.
Бистиң корр.
«Шын» №5 2024 чылдың январь 24