Июль 8–12 хүннеринде аныяк чогаалчыларның улус аразының ийиги фестивалы бистиң республикада болуп эртип турар. Ону Россияның Чогаалчылар эвилелиниң баштаар чериниң деткимчези-биле Тываның Чогаалчылар эвилели организастап эрттирип турар. Фестивальды эрттиреринге акша-хөреңги деткимчезин Тываның Чогаалчылар эвилелиниң кежигүннери боттары база кииргеннер.
Аныяк чогаалчыларның улус аразының фестивалы эрткен 2024 чылда база болуп эрткен. Аңаа аныяк чогаалчылар идепкейлиг киришкен. Ол фестиваль үезинде Тываның аныяк чогаалчыларының чогаалдарын Россияның Чогаалчылар эвилелин төлээлеп келген чогаалчылар-биле кады сайгарып көрген. Эң эки деп үнелелди алган чогаалдарны орус дылче очулдургаш, Россияның төп солун-сеткүүлдеринге үндүрген. Оларның авторларын Россияның чогаалчылар эвилелиниң кежигүнүнге хүлээп алган.
Аныяк чогаалчыларның улус аразының ийиги фестивалынга Россияның Чогаалчылар эвилелиниң баштаар чериниң даргазының бирги оралакчызы, дыл эртеминиң кандидады, шүлүкчү Нина Викторовна Попова, Россияның Чогаалчылар эвилелиниң национал литература талазы-биле килдис эргелекчизи, шүлүкчү, очулдурукчу Валерий Анатольевич Латынин, тыва чогаалдарның очулдурукчузу, шүлүкчү Николай Владимирович Переяслов, Даг-Алтайдан аныяк шүлүкчү Алена Олеговна Санчаа киржип келгеннер.
Июль сестиң хүнүнде аныяк чогаалчыларның улустар аразының ийиги фестивалының организакчылары парлалга конференциязын республиканың Национал музейиниң хуралдаар залынга эрттирген. Шүлүкчү Нина Попова, шүлүкчү, очулдурукчу Валерий Латынин, тыва чогаалдарның очулдурукчузу, шүлүкчү Николай Переяслов, Даг-Алтайдан аныяк шүлүкчү Алена Санчаа парлалга конференциязынга киржип, боттарының чогаадыкчы ажылы-биле чыылганнарны таныштырган, журналистерниң болгаш өске-даа кижилерниң айтырыгларынга харыылааннар.
Аныяк чогаалчыларның шүлүктериниң орус дылче одуруглар эдертир очулгазының шынарынга хамаарыштыр айтырыгга очулдурукчу Валерий Латынин «шоолуг эвес» деп харыылап, бо чылгы фестивальга сайгарар шүлүктер колдуунда бичии уругларга шүлүктер болганын дыңнадып, одуруг эдерип очулдурарында шүлүк тургузуу, чогаадыкчы хөөн илези-биле билдинмезин, ындыг чүүл уран-чечен очулгага шаптараазын дээрзин демдеглээн. Аныяк чогаалчылар фестивалынга кол чүүл чогаадыкчы ажыл дээрзин Валерий Латынин онзалап айтып, чогаалдар сайгарылгазының үезинде «чогаадыкчы сөөктерни шыңгыы сивирип чуур бис» деп чугаалаан.
Бо чылгы сайгарылга үезинде шилип алдынган чогаалдарны очулдурарынга, чырыкче үндүреринге деткимчени көргүзерин Россияның чогаалчылар эвилели аазаанын фестивальдың организакчылары дыңнатканнар.
Ш. МОНГУШ.
Чуруктарны интернеттен алган.
“Шын” №51 2024 чылдың июль 10
