Республиканың башкыларының чаңчылчаан августтуң чөвүлел хуралы бо чылын В. Көк-оол аттыг Национал хөгжүм-шии театрынга болган. Чөвүлел хуралга республиканың өөредилге адырының төлээлери — башкылар, удуртукчулар, хоочуннар болгаш хөй-ниитижилер киришкен. Театрның фойезин өөредилге адырының тергииннериниң фото-чуруктарының делгелгези каастаан.
Хуралды РФ-тиң Чырыдыышкын сайыды Сергей Кравцовтуң онлайн байыр чедириишкини-биле ажыткан. «Эрткен өөредилге чылында салдынган сорулгаларывыс доозазы боттанган. Ол дээш башкыларга, башкылар коллективтеринге, муниципалдыг өөредилге албан черлериниң удуртукчуларынга, оларның командаларынга, регионнарның сайыттарынга болгаш ниити билиг өөредилге албан черлериниң директорларынга өөрүп четтиргенимни илередир-дир мен. Ам мурнувуста чаа өөредилге чылында эвээш эвес сорулгалар салдынган – өөредилгениң шынарын бедидери. «Өөредилге» национал төлевилелдиң иштинде мурнадыр салдынган кол сорулга – өөредилгениң шынарының талазы-биле делегейниң он эң тергиин школаларының санынче кирери» – деп, чырыдыышкын сайыды айыткан. 2023 чылды Башкының болгаш дагдыныкчының чылы кылдыр РФ-тиң Президентизи В. Путин чарлаан болганда, башкы ажылының эрге-байдалын бедидер ажылдарны уламчылаар дээрзин ол демдеглээн. Ол ышкаш башкыларга өөредилге системазының хөгжүлдезинге хамаарыштыр боттарының санал-оналдарын киирерин сайыт дилээн.
ТР-ниң Чазак Даргазының социал айтырыглар талазы-биле оралакчызы Елена Хардикова Тываның Баштыңы Владислав Ховалыгның мурнундан башкыларга чаа өөредилге чылы-биле байырны чедиргеш, республикада өөредилге адырында байдалды таныштырган. Бо чылын Тываның Чазаа өөредилгениң инфраструктуразын чаартырынче улуг күжениишкинни үндүргенин Елена Владимировна демдеглээн: «Республика бюджединиң акша-хөреңгизиниң 35 хуузун чүгле өөредилге адырынче салып турар. Бо хүнде «Өөредилге» национал төлевилел-биле республикада 8 школа туттунуп турар. Ол школалар 2023 чылдың төнчүзүнде ажыглалга кирер. 2024 чылда 2 школа немежир. А бо чылын 5 уруглар сады туттунуп турар. Чурттуң Президентизиниң даалгазы-биле өөредилгениң инфраструктуразын чаартыр ажылдар – бистиң мурнадыр сорулгаларывыстың бирээзи. Республикада бир дугаар улуг капитал септелге ажылдарын эгелээн бис. Бо чылын 27 школада капитал септелгелер чоруп турар. Ниитизи-биле 2025 чылда 75-тен эвээш эвес школаларга капиталдыг септелгелерни чорудар (республикада 175 школа бар). Ук программа чүгле капитал септелге-биле кызыгаарланмайн турар, ында школаларның чаартылгазы, амгы үениң чаа дериг-херекселдери-биле дериири, өөредилге номнары-биле хандырары көрдүнген. Кол сорулга – уругларга болгаш башкыларга амгы үении-биле чаарттынган школаларга өөрениринге таарымчалыг байдалды тургузары, ылаңгыя көдээ черлерге» – деп, ол демдеглээн.
Дараазында Өөредилге адырынга хөй чылдарда үре-түңнелдиг ажыл-ижи дээш күрүне шаңналдары-биле эң-не төлептиг башкыларны байырлыг байдалга шаңнап-мактаан.
РФ-тиң Чырыдыышкын яамызының Хүндүлел бижии-биле Таңды кожууннуң Сосновка школазының немец болгаш англи дыл башкызы Светлана Алексеевна Сыргашеваны шаңнаан.
Тываның Баштыңының хүндүлел бижиктерин Барыын-Хемчиктиң Шекпээр ортумак школазының директору Анзор Танаш-оолович Кууларга, Каа-Хем кожууннуң Сизим ортумак школазының математика болгаш физика башкызы Алла Савельевна Ивановага тывыскан.
ТАР-ның 100 чылдаанынга тураскааткан юбилейлиг медаль-биле Кызылдың А.А. Алдын-оол аттыг 2 дугаар школаның орус дыл болгаш литература башкызы Дина Даировна Ондарны шаңнаан.
Күш-ажылдың хоочуну Сесирге Кыргысовна Найдан- оолга «Тыва Республиканың өөредилгезиниң алдарлыг ажылдакчызы» хүндүлүг атты тывыскан.
«Тыва Республиканың улустуң башкызы» хүндүлүг атка Сүт-Хөл кожууннуң Бора-Тайга ортумак школазының орус дыл болгаш литература башкызы Розалия Бораевна Куулар төлептиг болган.
Шаңналдар соонда ТР-ниң өөредилге сайыды Алексей Храмцов «Тургузуп турарывыс өөредилге системазы: чаа шиитпир үези» деп темага илеткелди кылган.
Башкылар 11 аңгы дискуссия шөлдеринге чарлып алгаш, өөредилгениң адыр аайы-биле айтырыгларын сайгарып чугаалашкан.
Алдынай Аракчаа.
Ада ТЮЛЮШТУҢ тырттырган чуруктары.
